उल्हासनगर दि . ११ ( प्रमोद दळवी ) : ठाणे पोलीस आयुक्तालयाच्या हद्दीतील महिलांच्या गळ्यातील मंगळसूत्र व सोनसाखळ्या जबरीने हिसकावून चोरी करणाऱ्या सराईत टोळीचा उल्हासनगर गुन्हे शाखेच्या पोलिसांनी पर्दाफाश केला आहे . पोलिसांना दोन आरोपींना अटक करण्यात यश आले असून त्यांच्याकडून ३ चोरीच्या दुचाकीसह तब्बल ९ लाख ८१ हजार रुपयांचा मुद्देमाल जप्त करण्यात आला आहे.
या कारवाईमुळे ठाणे, कल्याण आणि बदलापूर परिसरातील अनेक जबरी चोरीचे गुन्हे उघडकीस आले आहेत. महिलांच्या गळ्यातील मंगळसूत्र आणि सोन्याच्या साखळ्या हिसकावण्यासाठी चोरीच्या मोटरसायकलीचा वापर करणाऱ्या दोन सराईत आरोपींना उल्हासनगर गुन्हे शाखा घटक – ४ ने अटक केले असून आरोपींमध्ये हुसेनीमुख्तार इराणी उर्फ गजनी आणि गुलाम अभ्यास अमीरअली इराणी या दोघांचा समावेश आहे.
विठ्ठलवाडी पोलीस ठाण्यात दाखल असलेल्या जबरी चोरीच्या गुन्ह्याचा तपास करताना गुन्हे शाखेचे शेखर भावेकर यांना गुप्त माहिती मिळाली होती. त्या अनुषंगाने सापळा रचून मुख्य आरोपीला ताब्यात घेतल्यानंतर चौकशीत अनेक धक्कादायक माहिती उघडकीस आली आहे. आरोपींकडून तीन चोरीच्या दुचाकी सोन्याचे मंगळसूत्र, सोनसाखळ्या आणि इतर दागिने असा एकूण ९ लाख ८१ हजार रुपयांचा मुद्देमाल हस्तगत करण्यात आला आहे. या कारवाईमुळे विठ्ठलवाडी कासारवडवली, कळवा, हिललाईन, शिवाजीनगर तसेच बदलापूर पूर्व पश्चिम पोलीस ठाण्यातील अनेक गुन्हे उघडकीस आले आहेत. ठाणे पोलीस आयुक्तांच्या मार्गदर्शनाखाली गुन्हे शाखा घटक- ४ च्या पथकाने ही कारवाई केली असून आरोपीकडून आणखी गुन्ह्याचा तपास सुरू आहे.
