उल्हासनगर दि १९ ( प्रमोद दळवी ) : उल्हासनगर महानगरपालिकेच्या आयुक्त मनीषा आव्हाळे यांनी नवीन शैक्षणिक वर्ष सुरू होताच शाळांना भेटी देण्याच्या शुभांरभ केला. शुक्रवारी दि. १९/०६/२०२६ रोजी आयुक्त श्रीम. मनिषा आव्हाळे यांनी महानगरपालिकेच्या शाळा क्र. ३, १२, २३, २५, २६ या शाळांना आकस्मिक भेट दिली.
या भेटी दरम्यान आयुक्त श्रीम. मनिषा आव्हाळे यांनी वर्गातील विद्यार्थ्यांचे वाचन, लेखन, गणितीय क्रिया इत्यादींबाबत विद्यार्थ्यांशी संवाद साधला. तसेच काही विद्यार्थ्यांना कवितांचा अर्थ बाबत विचारणा केली. विद्यार्थ्यांनीही त्यांना याबाबत उत्तम प्रतिसाद दिला. शाळांमधील डिजीटल एज्युकेशन सिस्टम प्रणाली कार्यरत असल्याबाबत माहिती घेतली. विद्यार्थ्यांशी दिलखुलासपणे आयुक्त श्रीम. मनिषा आव्हाळे यांनी गप्पा मारल्या.
पुढील एक महिन्याच्या कालावधीकरीता प्रायोगिक तत्वावर सर्व महानगरपालिकांच्या शाळांमध्ये लेखन, वाचन, गणितीय क्रिया व हस्ताक्षर सुधार इत्यादींबाबत उपक्रम राबविण्याबाबत प्रशासनास आदेशित केले व शिक्षणात आमुलाग्र बदल करणेबाबत निर्देश दिले. सदर भेटी दरम्यान अनंत जवादवार, उप आयुक्त (शिक्षण), व. दिपक धनगर, प्रशासन अधिकारी (शिक्षण) उपस्थित होते.
