उल्हासनगर दि. १ : “पैसा कमविण्याइतकंच, योग्य गुंतवणूक करून तो वाढवणंही तेवढंच महत्त्वाचं आहे,” या विचाराला मूर्त स्वरूप देत एसएसटी महाविद्यालयाच्या आयक्यूएसी आणि कॅपॅसिटी बिल्डींग कमिटीतर्फे सेबी (SEBI) च्या सहकार्याने प्राध्यापक व कर्मचाऱ्यांसाठी गुंतवणूकदार प्रबोधन वर्गाचे आयोजन केले.
महाविद्यालयाच्या ऑडिटोरियममध्ये आयोजित या मार्गदर्शन सत्रात सेबीच्या मान्यताप्राप्त प्रशिक्षक डॉ. सारिका लोहाना यांनी उपस्थितांना गुंतवणुकीचे महत्त्व, विविध गुंतवणूक साधने, शेअर बाजार, म्युच्युअल फंड्सचे प्रकार, तसेच गुंतवणुकीसंबंधी कायदे व नियम यांची सखोल माहिती दिली. उदाहरणांसह सादर केलेल्या या माहितीमुळे उपस्थितांमध्ये गुंतवणूकबाबत जागरूकता वाढली असून भविष्यकाळात योग्य पद्धतीने गुंतवणूक करण्याचा आत्मविश्वास मिळाल्याच्या प्रतिक्रिया प्राध्यापक व कर्मचाऱ्यांनी दिल्या. ही संकल्पना महाविद्यालयाचे चेअरमन आणि संस्थापक प्राचार्य डॉ.पूरस्वानी यांची असून, त्यांच्या पुढाकारातून आणि आयक्यूएसी समन्वयक डॉ. खुशबू पुरस्वानी यांच्या मार्गदर्शनातून हा उपक्रम राबविण्यात आला.
यापूर्वीही महाविद्यालयात बॉम्बे स्टॉक एक्सचेंजच्या माध्यमातून प्राध्यापक,कर्मचारी आणि विद्यार्थ्यांसाठी गुंतवणूकदार जागृती कार्यक्रम यशस्वीपणे पार पडला आहे. या उपक्रमाच्या यशस्वीतेसाठी उपप्राचार्य डॉ. दीपक गवादे, डॉ.संतोष करमानी तसेच उपप्राचार्य आणि राष्ट्रीय सेवा योजनेचे ठाणे जिल्हा समन्वयक प्रा.जीवन विचारे आणि अन्य प्राध्यापकांनी मोलाचे सहकार्य केले. हा उपक्रम आर्थिक साक्षरतेसाठी एक महत्त्वपूर्ण पाऊल ठरला आहे.
