उल्हासनगर दि.१८ ( प्रमोद दळवी ) :महाराष्ट्राचे परिवहनमंत्री प्रताप सरनाईक यांच्या आदेशानुसार व कल्याण आर.टी.ओ. यांच्या निर्देशांच्या अनुषंगाने शिवसेना गटनेते तथा सभागृह नेते अरुण अशान यांच्या उ.म.पा गटनेता कार्यालय, उल्हासनगर महानगरपालिका येथे उल्हासनगर रिक्षा युनियनची महत्त्वपूर्ण बैठक आयोजित करण्यात आली होती.
१ ऑगस्ट २०२६ पासून रिक्षाचालकांना प्रवाशांशी मूलभूत मराठी भाषेत संवाद साधणे अपेक्षित असल्याच्या पार्श्वभूमीवर या बैठकीत सविस्तर चर्चा करण्यात आली. या उपक्रमासाठी कोकण मराठी साहित्य परिषद यांचे विशेष सहकार्य लाभणार असून, प्रा. डॉ. प्रदीप ढवळ व सौ. नमिता कीर यांनी मराठी भाषा प्रशिक्षण, संवाद कौशल्य विकास आणि जनजागृती मोहिमेबाबत मार्गदर्शन केले. यावेळी उल्हासनगर रिक्षा युनियनचे अध्यक्ष हरजिंदरसिंह भुल्लर (विक्की) यांनी रिक्षाचालक बांधवांना शासनाच्या सूचनांचे पालन करण्याचे आवाहन केले. तसेच मराठी भाषा शिकण्यासाठी आवश्यक प्रशिक्षण, मार्गदर्शन व सहकार्य युनियनमार्फत उपलब्ध करून दिले जाईल असे सांगितले. बैठकीत मोफत मराठी संभाषण वर्ग, प्रशिक्षण शिबिरे, जनजागृती अभियान आणि मार्गदर्शन सत्रे आयोजित करण्याबाबतही निर्णय घेण्यात आला.
त्यावेळी अरुण अशान ( शिवसेना गटनेते / सभागृह नेते ), हरजिंदरसिंह भुल्लर (विक्की) – अध्यक्ष उल्हासनगर रिक्षा युनियन, शेखर यादव, प्रा. डॉ. प्रदीप ढवळ (कोकण मराठी साहित्य परिषद) ,सौ. नमिता कीर ( कोकण मराठी साहित्य परिषद), सौ. साक्षी सर्वे ( नगरसेविका) ,सौ. मीना सौंडे ( नगरसेविका) , प्रकाश माळी ( समन्वयक) ,शिवसेना विभागप्रमुख .प्रमोद पांडेय व अन्य यावेळी उपस्थित होते.
