उल्हासनगर दि.७ ( प्रमोद दळवी ) : उल्हासनगर शहराच्या ७७ व्या स्थापना दिनानिमित्त शनिवार, ८ ऑगस्ट २०२६ रोजी सकाळी ११.०० वाजता स्विमिंग पूल, विराट अंबे स्पोर्ट्स क्लब, उल्हासनगर महानगरपालिका मुख्यालयाच्या मागे, कॅम्प क्र. ३ येथे स्थापना दिनाचा कार्यक्रम उत्साहात साजरा करण्यात येणार आहे.
यंदाच्या स्थापना दिनानिमित्त “शिक्षादान अभियान” हा सामाजिक उपक्रम राबविण्यात येणार असून, कार्यक्रमास उपस्थित राहणाऱ्या प्रत्येक नागरिकाने फुलहार आणण्याऐवजी एक वही (रजिस्टर) आणि एक पेन सोबत आणून या अभियानात सहभाग नोंदवावा असे आवाहन आयोजक दिलीप मालवणकर, शशिकांत दायमा यांनी केले आहे. संकलित करण्यात येणारे शैक्षणिक साहित्य गरजू विद्यार्थ्यांना वितरित करण्यात येणार आहे. कार्यक्रमामध्ये उल्हासनगरच्या स्थापना शिलालेखास अभिवादन करून शहराच्या विकासासाठी योगदान देणाऱ्या सर्वांचा गौरव करण्यात येणार आहे. तसेच शहराच्या उज्ज्वल भविष्यासाठी एकजुटीचा संकल्प करण्यात येईल.
उल्हासनगर हे महाराष्ट्रातील स्वतःचा स्थापना दिवस साजरा करणारे पहिले शहर म्हणून ओळखले जाते. त्यामुळे या ऐतिहासिक दिवसाचे महत्त्व लक्षात घेऊन मोठ्या संख्येने उपस्थित राहून शहराला अभिवादन करण्याचे आवाहन करण्यात आले आहे.
