- सीसीटीव्ही फुटेजच्या आधारे कल्याण लोहमार्ग पोलिसांनी शोधून काढला आरोपी
कल्याण दि.१२ ( प्रमोद दळवी ) : कल्याण रेल्वे स्थानकातून १६ वर्षीय अल्पवयीन मुलीचे अपहरण करत तिच्यावर धावत्या एक्सप्रेसमध्ये लैंगिक अत्याचार करणाऱ्या नराधमाला कल्याण लोहमार्ग पोलिसांनी सीसीटीव्ही फुटेजच्या माध्यमातून तपास करून त्याला अकोला जिल्ह्यातील पातुर तालुक्यातील शेकापूर गावात सापळा रचून गजाआड करण्याची कामगिरी केली आहे. पोलिसांनी अटक केलेल्या त्या नाराधमाचे नाव गजानन चव्हाण ( ३० ) असे आहे.
पोलीस सूत्रांकडून मिळालेल्या माहितीनुसार पीडित अल्पवयीन मुलगी ही कल्याण परिसरात राहणारी आहे. मूळचा अकोला जिल्ह्यात पातुर तालुक्यातील शेकापूर गावाचा रहिवासी असलेला गजानन हा कामानिमित्त टिटवाळा येथे आला होता. तो त्याच्या भावाच्या घरी राहत होता. २९ जून रोजी ती पीडित मुलगी कल्याण रेल्वे स्थानकात आली असता गजानन याची तिच्याशी भेट झाली. त्याने तिच्या अज्ञात पणाचा फायदा घेत तिचे अपहरण करून तिला लोकल ट्रेनने टिटवाळा येथे आपल्या भावाच्या घरी नेले. दुसऱ्या दिवशी टिटवाळा ते कसारा लोकलने प्रवास करीत कसारा रेल्वे स्थानकातून अकोल्याकडे जाणारी एक्सप्रेसमध्ये बसून प्रवास करीत होता. या प्रवासादरम्यान पीडित मुलीवर धावत्या एक्सप्रेसमध्ये लैंगिक अत्याचार केला, शिवाय तिला नराधमाने आपल्या मूळ गावी बसमध्ये नेत तिच्यावर अत्याचार करत पीडित मुलीला अकोला रेल्वे स्थानकात सोडून पळून गेला होता.
दरम्यान, अकोला लोहमार्ग पोलिसांनी पीडित मुलीला ताब्यात घेऊन तिची चौकशी केली असता हा धक्कादायक प्रकार समोर आला, त्यानंतर अकोला रेल्वे पोलीस ठाण्यात पीडित मुलीच्या वडिलांनी दिलेल्या तक्रारीवरून नराधम गजाननवर विविध कलमान्वये गुन्हा दाखल करण्यात आला. व तो गुन्हा कल्याण लोहमार्ग पोलिसांकडे वर्ग केलाय. या गुन्ह्याचे गांभीर्य पाहता वरिष्ठ पोलीस निरीक्षक पंढरी कांदे यांच्या मार्गदर्शनाखाली पोलीस निरीक्षक लक्ष्मण चव्हाण यांच्या पथकानं तपास सुरू केला. तपासादरम्यान नराधम पीडित मुलीला कल्याण स्थानकातून घेऊन जात असल्याचं सीसीटीव्ही फुटेजमध्ये दिसून आले. कल्याण लोहमार्ग पोलीस पथकानं त्याची ओळख पटवून त्याच्या मागावर पोलीस असतानाच तो मूळगाव असलेल्या अकोला जिल्ह्यातील पातूर तालुक्यातील शेकापूर गावात असल्याची माहिती मिळाली. या माहितीच्या आधारे स्थानिक पातूर पोलिसांच्या मदतीनं सापळा रचून त्याला अटक केली. आरोपीला कल्याणच्या रेल्वे न्यायालयात हजर केलं असता त्याला पोलीस कोठडी सुनावण्यात आली आहे. या घटनेचा अधिक तपास कल्याण लोहमार्ग पोलीस करीत आहेत.
