उल्हासनगर दि. ११ ( प्रमोद दळवी ) : उल्हासनगरातील कॅम्प क्रमांक ४ येथील कुर्ला कॅम्प चौक परिसरात झालेल्या सतनामसिंग लबाना यांच्या निर्घृण हत्येप्रकरणी विठ्ठलवाडी पोलिसांनी वेगवान कारवाई करत मुख्य आरोपी गुरप्रीतसिंग उर्फ अनिस करतारसिंग लबाना (वय १९) याला घटनेनंतर हिल्लाईन पोलिसांनी अवघ्या काही तासांत अटक केली होती . त्यानंतर परिसरात कायद्याचा धाक निर्माण करण्यासाठी आणि गुन्हेगारी प्रवृत्तीला आळा घालण्याच्या उद्देशाने विठ्ठलवाडी पोलिसांनी आरोपीची कडक पोलीस बंदोबस्तात पायी धिंड काढली.
मिळालेल्या माहितीनुसार, पूर्ववैमनस्यातून सतनामसिंग लबाना यांच्यावर प्राणघातक हल्ला करण्यात आला होता. या हल्ल्यात त्यांचा मृत्यू झाला. घटनेची माहिती मिळताच विठ्ठलवाडी पोलिसांनी तातडीने तपासाची सूत्रे हाती घेत आरोपीचा शोध सुरू केला. त्याच दरम्यान हिल्लाईन पोलिसांनी अनिस लबाना याचा शोध घेऊन त्याला त्वरित ताब्यात घेऊन विठ्ठलवाडी पोलिसांच्या स्वाधीन केले. आरोपी गुरप्रीतसिंग उर्फ अनिस करतारसिंग लबाना याच्या अटकेनंतर विठ्ठलवाडी पोलिसांनी वरिष्ठ पोलीस निरीक्षक चंद्रहार गोडसे यांच्या नेतृत्वाखाली आरोपीची कॅम्प क्रमांक – ४ मधील सुभाष टेकडी, कानसाई रोड, कुर्ला कॅम्प चौक तसेच परिसरातील इतर महत्त्वाच्या भागांतून पायी धिंड काढली. या मार्गामध्ये हत्या घडलेले ठिकाण तसेच आरोपीच्या कथित गुन्हेगारी कारवायांमुळे नागरिकांमध्ये भीतीचे वातावरण निर्माण झाल्याचे सांगितल्या जाणाऱ्या भागांचाही समावेश होता. मोठ्या पोलीस बंदोबस्तात ही कारवाई करण्यात आली.
या कारवाईमागील उद्देश गुन्हेगारांमध्ये कायद्याची भीती निर्माण करणे, समाजविघातक प्रवृत्तींना कठोर संदेश देणे आणि सर्वसामान्य नागरिकांचा पोलिसांवरील व कायद्यावरील विश्वास अधिक दृढ करणे हा असल्याचे पोलिसांकडून सांगण्यात आले. दरम्यान, पोलिसांच्या तातडीच्या आणि कठोर कारवाईचे स्थानिक नागरिकांनी स्वागत केले. या कारवाईमुळे परिसरातील दहशतीचे वातावरण कमी होण्यास मदत होईल तसेच गुन्हेगारांविरोधात पोलिसांची कठोर भूमिका स्पष्ट झाल्याची भावना नागरिकांनी व्यक्त केली. सतनामसिंग लबाना हत्याप्रकरणी विठ्ठलवाडी पोलीस अधिक तपास करत आहेत.
