अंबरनाथ दि. २६ ( प्रमोद दळवी ) : अंबरनाथ येथील ऑडनस इस्टेट येथील केंद्रीय विद्यालयात नीटची परीक्षा देण्यासाठी आलेल्या एका विद्यार्थिनी जवळ परीक्षेसाठी लागणारा मोठा फोटो उपलब्ध नसल्याने तसेच परीक्षेसाठी थोडाच वेळ शिल्लक असताना आपण फोटो काढण्यासाठी गेलो तर परीक्षा केंद्राचा गेट बंद होईल व आपल्याला परीक्षा देता येणार नाही याचा विचार करत रडत बसलेल्या त्या विद्यार्थिनीच्या मदतीला अंबरनाथ पोलिसांनी वेळेस धाव घेऊन तिला मदत केली. तिला फोटो उपलब्ध करून दिल्याने तिला नीटची परीक्षा देता आली. खाकी वर्दीतील माणुसकीचा प्रकार अंबरनाथ मध्ये सर्वांना पाहायला मिळाला.
अंबरनाथ ऑर्डनन्स येथील केंद्रीय विद्यालय येथे NEET परीक्षा होती. त्यावेळी परीक्षेच्या बंदोबस्तासाठी अंबरनाथ पोलीस ठाण्याचे वरिष्ठ पोलीस निरीक्षक शब्बीर सय्यद व सहाय्यक पोलीस निरीक्षक सुभाष पानसरे व इतर कर्मचारी उपस्थित होते. त्यावेळी विद्यार्थिनी आलिशा हिच्या जवळ नीटच्या परीक्षेसाठी मोठा फोटो उपलब्ध नव्हता. याशिवाय तिने आपल्या जवळील पैसे, मोबाईल फोन व इतर वस्तू आपल्या वडिलांकडे दिल्या होत्या. वडील तिला परीक्षा केंद्रावर सोडून गेल्यावर. काही वेळानंतर तिच्याजवळ फोटो नसल्याचे तिच्या लक्षात आले. तिला परीक्षा केंद्रात प्रवेश मिळणार नाही हे समजताच ती खूपच घाबरली. याशिवाय तिच्याजवळ पैसे नसल्याने आणि वडिलांची संपर्क करण्यासाठी मोबाईल नव्हता. परीक्षा केंद्रापासून फोटो स्टुडिओ देखील लांब होते . त्यात परीक्षा सुरू होण्यास अर्धा तास शिल्लक राहिल्या होता. ती फोटो स्टुडिओतून फोटो घेऊन परत केंद्रावर येऊ शिकणार नाही हे तिच्या लक्षात येताच ती रडू लागली. आपल्याला नीटची परीक्षा मुकावी लागेल या विचारणे ती रडत असताना पोलीस बंदोबस्तावर असलेले अंबरनाथ पोलीस ठाण्याचे वरिष्ठ पोलीस निरीक्षक शब्बीर सय्यद व सहाय्यक पोलीस निरीक्षक सुभाष पानसरे यांनी त्या विद्यार्थिनीच्या मदतीला धाव घेतली. त्यांनी त्वरित अंबरनाथ पोलीस स्टेशनच्या सरकारी वाहनातून तिला फोटो स्टुडिओमध्ये नेऊन तात्काळ फोटो काढून दिला.
पोलिसांनी वेळीच प्रसंगी तिला मदत केल्यामुळे त्या विद्यार्थिनीला नीटची परीक्षा देता आली. त्या विद्यार्थिनीने पोलिसांचे आभार प्रकट केले. य घटनेवरून त्या परीक्षा केंद्रावर खाकी वर्दीतील माणुसकीचा प्रकार सर्वांना पाहायला मिळाला. अंबरनाथ पोलिसांची संवेदनशीलता, तत्परता आणि विद्यार्थ्यांप्रती असलेली बांधिलकी यांचे हे उत्तम उदाहरण आहे.
