- उल्हासनगर गुन्हे अन्वेषण विभागाच्या पोलिसांची कामगिरी
उल्हासनगर दि २९ ( प्रमोद दळवी ) : गांजा व चरस या अमली पदार्थाची विक्री करण्याच्या तयारीत असलेल्या एका इसमावर उल्हासनगर गुन्हे शाखेच्या पोलिसांनी झडप घालून त्याला रंगेहात पकडले आहे. त्याच्याकडून सुमारे एक लाख तीस हजार रुपये किमतीचा गांजा व चरस पोलिसांनी जप्त केला आहे.
पोलीस सूत्राने दिलेल्या माहितीनुसार उल्हासनगर गुन्हे शाखेतील एस आय बबन बांडे यांना अंबरनाथ पश्चिमेतील भगतसिंगनगर परिसरात एक इसम अमली पदार्थाची विक्री करण्यासाठी येणार असल्याची एक खात्रीशीर गोपनीय माहिती मिळाली होती. त्यानुसार वरिष्ठ पोलीस निरीक्षक अशोक कोळी यांच्या मार्गदर्शनाखाली सहाय्यक पोलीस निरीक्षक श्रीरंग गोसावी बबन बांडे, चंद्रकांत सावंत , सुरेश जाधव , गणेश गावडे, योगेश वाघ, राजेंद्र थोरवे, विक्रम जाधव, संजय शेरमाळे, रामदास उगले , महिला पोलीस मनोरमा सावळे या पोलीस पथकांनी घटनास्थळी सापळा रचला . या ठिकाणी पोलिसांनी संशयित म्हणून अल्ला बक्ष शेख (५४ ) राहणार भगतसिंगनगर, बडोदा बँकच्या मागे, झोपडपट्टी अंबरनाथ पश्चिम, याला ताब्यात घेतले.
पोलिसांनी त्याची अंग झडती घेतली असता त्याच्या जवळील झोळीतून एक किलो ४०० ग्रॅम गांजा सुमारे ९० हजार रुपये किमतीचा, व २५ ग्रॅम चरस सुमारे ४० हजार रुपये किमतीचा असा एकूण एक लाख तीस हजार रुपयाचा अमली पदार्थ पोलिसांनी त्याच्याकडून हस्तगत केला. पोलिसांनी पंचनामा करून तो मुद्देमाल जप्त केला आहे. या गुन्ह्यात त्याच्यासोबत आणखीन एक महिला सहभागी असल्याची ही माहिती पोलिसांना मिळाली. तिचे नाव शबाना असल्याचे पोलिसांना समजले. याप्रकरणी अंबरनाथ पोलीस ठाण्यात एनडीपीएस कलमान्वये अल्ला बक्ष शेख व शबाना या दोघांविरुद्ध गुन्हा दाखल करण्यात आले असल्याची माहिती पोलिसांनी दिली. पोलीस त्या महिलेचा शोध घेत असून. तिला पकडल्यावर अमली पदार्थ विक्री करणाऱ्या टोळी पोलिसांच्या हाती लागण्याची शक्यता वर्तवली जात आहे.
