उल्हासनगर दि. २६ ( प्रमोद दळवी ) : राष्ट्रवादी काँग्रेस पक्ष, उल्हासनगर शहर जिल्ह्याच्या वतीने महाराष्ट्र प्रदेश सरचिटणीस मा. हरकिरण कौर सोनिया धामी यांच्या मार्गदर्शनाखाली व विशेष प्रयत्नांतून मा. अजितदादा पवार यांच्या जयंतीनिमित्त ४० वर्षांवरील महिलांसाठी ‘मेनोपॉज जनजागृती व्याख्यान’ या विशेष कार्यक्रमाचे उत्साहपूर्ण वातावरणात यशस्वी आयोजन करण्यात आले.
कार्यक्रमाची सुरुवात मा. अजितदादा पवार यांच्या प्रतिमेस पुष्पहार अर्पण करून व दीपप्रज्वलनाने करण्यात आली. यावेळी उपस्थित मान्यवरांनी अजितदादा पवार यांच्या कार्याचा गौरव करत समाजोपयोगी उपक्रमांच्या माध्यमातून जनजागृती करण्याचा संकल्प व्यक्त केला. कार्यक्रमाच्या प्रमुख वक्त्या डॉ. (श्रीमती) सुषमा तोमर यांनी ‘मेनोपॉज’ या विषयावर सखोल मार्गदर्शन केले. त्यांनी मेनोपॉज हा महिलांच्या आयुष्यातील नैसर्गिक टप्पा असून त्याबाबत समाजात असलेले गैरसमज दूर करण्याची आवश्यकता अधोरेखित केली. तसेच संतुलित आहार, नियमित व्यायाम, मानसिक आरोग्याची काळजी, सकारात्मक जीवनशैली आणि वेळोवेळी वैद्यकीय सल्ला घेण्याचे महत्त्व त्यांनी उपस्थित महिलांना समजावून सांगितले. या व्याख्यानादरम्यान महिलांनी उत्स्फूर्त सहभाग नोंदवत विविध प्रश्न विचारले. डॉ. तोमर यांनी त्यांच्या शंकांचे सविस्तर निरसन करून महिलांच्या आरोग्याविषयी जागरूक राहण्याचे आवाहन केले. उपस्थित महिलांनी हा कार्यक्रम अत्यंत ज्ञानवर्धक, प्रेरणादायी आणि उपयुक्त असल्याची भावना व्यक्त करत त्याचे मनापासून कौतुक केले.
मा. हरकिरण कौर सोनिया धामी यांच्या प्रेरणा, मार्गदर्शन आणि विशेष प्रयत्नांतून आयोजित हा उपक्रम महिलांमध्ये आरोग्याबाबत जागरूकता निर्माण करणारा तसेच समाजात सकारात्मक संदेश देणारा महत्त्वपूर्ण उपक्रम ठरला. कार्यक्रमाच्या शेवटी प्रमुख वक्त्या डॉ. (श्रीमती) सुषमा तोमर, उपस्थित सर्व मान्यवर, महिला भगिनी, पक्षाचे पदाधिकारी, कार्यकर्ते तसेच कार्यक्रमाच्या यशस्वी आयोजनासाठी सहकार्य करणाऱ्या सर्वांचे मनःपूर्वक आभार मानण्यात आले.
