बदलापूर दि. २२: आगामी मान्सूनच्या पार्श्वभूमीवर शहरात अतिवृष्टी, पूरस्थिती, पाणी साचणे तसेच इतर संभाव्य आपत्तींचा सामना करण्यासाठी आणि नागरिकांना कोणताही त्रास होऊ नये यासाठी आवश्यक उपाययोजनांचा आढावा घेण्यासाठी कुळगाव बदलापूर नगरपरिषद मध्ये शुक्रवारी सकाळी ११.३० वाजता नगराध्यक्ष दालन सभागृह येथे मा. नगराध्यक्षा श्रीमती रुचिता घोरपडे यांच्या अध्यक्षतेखाली विशेष आढावा बैठकीचे आयोजन करण्यात आले.
या बैठकीत मान्सूनपूर्व तयारी, विभागांमधील समन्वय तसेच आपत्कालीन नियोजन याबाबत सविस्तर चर्चा करण्यात आली. मा. नगराध्यक्षा श्रीमती रुचिता घोरपडे यांनी मान्सून काळात उद्भवू शकणाऱ्या संभाव्य अडचणींचा आढावा घेत आवश्यक सूचना दिल्या. मुख्याधिकारी श्री. मारुती गायकवाड यांनी संबंधित विभागांना दक्ष राहून आवश्यक उपाययोजना तात्काळ राबविण्याचे निर्देश दिले.शहरात कुठेही पाणी साचणार नाही याची दक्षता घेणे, वादळामुळे कोसळणारी झाडे त्वरित हटविणे, पथदिवे नियमित सुरू ठेवणे तसेच विद्युत पोलवरील सर्व जॉईंटची तपासणी करण्याबाबत संबंधित विभाग व वीज वितरण कंपनीच्या अधिकाऱ्यांना सूचना करण्यात आल्या.सदर बैठकीस मा. नगराध्यक्षा श्रीमती रुचिता घोरपडे, मुख्याधिकारी श्री. मारुती गायकवाड, बांधकाम समिती सभापती श्री. रमेश सोळसे, नियोजन समिती सभापती श्री. संभाजी शिंदे, पाणीपुरवठा समिती सभापती श्री. शैलेश वडनेरे, गटनेते श्री. शरद तेली तसेच विविध शासकीय विभागांचे अधिकारी उपस्थित होते.
