उल्हासनगर दि. ८ ( प्रमोद दळवी ) : आंतरराष्ट्रीय महिला दिनाचे औचित्य साधून राज्य शासनाच्या निर्देशानुसार महिलांच्या आरोग्य संरक्षणासाठी HPV (Human Papillomavirus) लसीकरण मोहीम – गर्भाशय मुखाचा कर्करोग प्रतिबंध ही मोहीम उल्हासनगर महानगरपालिकेमार्फत रविवारी शुभारंभ करण्यात आली
या मोहिमेचे उद्घाटन दि ८ मार्च २०२६ रोजी रविवारी सकाळी ११.०० वाजता नागरी प्राथमिक आरोग्य केंद्र क्र. २. नेहरू चौक, उल्हासनगर-२ येथे मा. महापौर श्रीमती अश्विनीताई निकम यांच्या शुभ हस्ते व मा. आयुक्त श्रीमती मनीषा आव्हाळे (भा. प्र. से.), मा. उपमहापौर अमर लुंड, यांच्या प्रमुख उपस्तिथीत पार पडले. तसेच महानगरपालिकेचे मा. उपायुक्त (वै.आ.वि) अनंत जवादवार, डॉ. मोहिनी धर्मा वैद्यकीय आरोग्य अधिकारी व आरोग्य विभागाचे अधिकारी कर्मचारी उपस्थित होते.
या प्रसंगी वैद्यकीय आरोग्य अधिकारी डॉ. मोहिनी धर्मा यांनी उपस्थितांना HPV लस, गर्भाशय मुखाचा कर्करोग प्रतिबंध व लसीकरण मोहिमेचे महत्त्व याबाबत सविस्तर माहिती दिली. तसेच मा. महापौर, मा. उपमहापौर व मा. आयुक्त मॅडम यांनी देखील नागरिकांना HPV लसीकरणाचे महत्त्व सांगून या मोहिमेला व्यापक प्रतिसाद देण्याचे आवाहन केले व HPV लसीकरण मोहिमेच्या प्रसार व जनजागृतीसाठी (advocacy) मार्गदर्शन केले.
या मोहिमेअंतर्गत १४-१५ वर्षे वयोगटातील मुलींना HPV लसीकरण करण्यात येणार असून ही मोहीम दि. ८ मार्च २०२६ पासून पुढील ९० दिवसांपर्यंत राबविण्यात येणार आहे. नागरिकांच्या सोयीसाठी हे लसीकरण त्यांच्या जवळच्या नागरी प्राथमिक आरोग्य केंद्रांमध्ये (न.प्रा.आ. केंद्र) उपलब्ध करून देण्यात येणार आहे.
आज उद्घाटनाच्या दिवशी एकूण ११ मुलींना HPV लस देण्यात आली असून कोणतीही ALFI (Adverse Event Following Inamunization) नोंदवली गेलेली नाही, अशी माहिती आरोग्य विभागाकडून देण्यात आली. HPV लस ही गर्भाशय मुखाच्या कर्करोगापासून बचाव करण्यासाठी अत्यंत प्रभावी मानली जाते या लसीकरणामुळे भविष्यातील कर्करोगाचा धोका मोठ्या प्रमाणात कमी करता येतो. अधिक माहितीसाठी नागरिकांनी आपल्या जवळच्या आरोग्य केंद्राशी अथवा आशा (ASIA) सेविकेशी संपर्क साधावा, असेही आवाहन उल्हासनगर महानगरपालिका वैद्यकीय आरोग्य अधिकारी डॉ. मोहिनी धर्मा यांनी केले आहे.
