उल्हासनगर दि. १४ ( प्रमोद दळवी ) : बदलापूर पूर्व परिसरातील आपटेवाडी रोड येथील मोरया ज्वेलर्स तसेच त्यांच्याकडे दागिने घेऊन आलेल्या ग्राहकांची फसवणूक करून दागिन्यांचा अपहार करणाऱ्या फरार आरोपीस गुन्हे शाखा, घटक-४, उल्हासनगरच्या पथकाने अहिल्यानगर येथून अटक केली आहे. रोहित मल्हारी आंधळे असे अटक करण्यात आलेल्या आरोपीचे नाव आहे.
याप्रकरणी बदलापूर पूर्व पोलीस ठाण्यात गु.र.नं. ३३८/२०२६ अन्वये भारतीय न्याय संहिता २०२३ मधील कलम ३१८(४), ३१६(२) व ३(२) प्रमाणे गुन्हा दाखल करण्यात आला होता.मिळालेल्या माहितीनुसार, आरोपी रोहित आंधळे याने मोरया ज्वेलर्सचे मालक तसेच त्यांच्याकडे आलेल्या ग्राहकांचा विश्वास संपादन केला. या विश्वासाचा गैरफायदा घेत त्याने सोन्याचे दागिने स्वतःकडे घेतले आणि त्यांचा अपहार केल्याचा आरोप आहे. गुन्हा दाखल झाल्यानंतर आरोपी फरार झाला होता. दरम्यान, वरिष्ठ पोलीस अधिकाऱ्यांच्या आदेशानुसार गुन्हे शाखा, घटक-४, उल्हासनगरकडून या गुन्ह्याचा समांतर तपास सुरू होता. तपासादरम्यान गुन्ह्यातील फरार आरोपी अहिल्यानगर येथे लपून बसल्याची गोपनीय माहिती पोलीस हवालदार मंगेश जाधव यांना मिळाली. या माहितीच्या आधारे वरिष्ठांच्या आदेशाने गुन्हे शाखेचे पथक अहिल्यानगर येथे रवाना करण्यात आले.पथकाने अहिल्यानगर परिसरात आरोपीचा शोध घेतला असता रोहित मल्हारी आंधळे हा पोलिसांच्या हाती लागला. त्यास ताब्यात घेऊन दि. २९ जुलै २०२६ रोजी अटक करण्यात आली.
अटकेनंतर आरोपीकडे पोलिसांनी अधिक तपास केला असता, त्याने फिर्यादी तसेच त्यांच्या ग्राहकांकडील दागिने फसवणूक करून घेतल्याची कबुली दिल्याचे पोलिसांनी सांगितले. आरोपीला न्यायालयासमोर हजर केले असता न्यायालयाने त्यास दि. १० ऑगस्ट २०२६ पर्यंत पोलीस कोठडी मंजूर केली होती.पोलीस कोठडीदरम्यान आरोपी रोहित मल्हारी आंधळे याच्याकडून पोलिसांनी मोठी कारवाई करत फसवणुकीतील १ कोटी १२ लाख ४२ हजार २८३ रुपये किमतीचे तब्बल ८६५ ग्रॅम वजनाचे सोन्याचे दागिने हस्तगत केले आहेत. या कारवाईमुळे दागिने फसवणूक प्रकरणातील महत्त्वाचा पुरावा पोलिसांच्या हाती लागला आहे. सदर गुन्ह्याचा पुढील तपास सहाय्यक पोलीस निरीक्षक श्रीरंग गोसावी गुन्हे शाखा घटक-४, उल्हासनगर हे करीत आहेत.
वरिष्ठांच्या मार्गदर्शनाखाली उल्लेखनीय कामगिरी
ही कारवाई डॉ. पंजाबराव उगले, पोलीस सहआयुक्त (गुन्हे), अमरसिंह जाधव, पोलीस उपआयुक्त (गुन्हे) आणि शेखर बागडे, सहाय्यक पोलीस आयुक्त (शोध-१) यांच्या मार्गदर्शनाखाली करण्यात आली. या कारवाईत वरिष्ठ पोलीस निरीक्षक राजेश गज्जल, सपोनि श्रीरंग गोसावी, पोउनि अशोक पवार, सपोउनि बबन बांडे, पोहवा गणेश गावडे, पोहवा राजेंद्र थोरवे, पोहवा मंगेश जाधव, पोहवा योगेश वाघ, पोहवा अशोक थोरवे, पोहवा प्रकाश पाटील, पोहवा रितेश वंजारी, पोहवा सतीश सपकाळे, पोहवा अमर कदम, पोहवा चंद्रकांत सावंत, पोहवा सुरेश जाधव, पोहवा शेखर भावेकर, पोहवा मिलिंद हिंदूराव, पोहवा किशोर पाटील, पोशि विक्रम जाधव, पोशि बाबूलाल जाधव, पोशि प्रसाद तोंडलीकर, पोशि संजय शेरमाळे, पोशि रेवणनाथ शेकडे, पोशि रामदास उगले, मपोहवा मिनाक्षी खेडेकर, मपोना कुसुम शिंदे आणि मपोशि मनोरमा सावळे यांचा समावेश असलेल्या पोलीस पथकाने ही कामगिरी बजावली.
