उल्हासनगर दि १२ : शैक्षणिक, सामाजिक, साहित्यिक व संस्कारक्षम कार्याबद्दल उल्हासनगर येथील हनुमान व्यवस्थापक मंडळ संचलित छत्रपती शिवाजी महाराज प्राथमिक शाळेचे अध्यक्ष डॉ. अनिल गणपत पावसे यांना स्विफ्ट एन लिफ्ट मीडिया ग्रुप यांच्या वतीने आयोजित भव्य सोहळ्यात ‘राष्ट्रीय शिक्षणरत्न पुरस्कार २०२६’ प्रदान करून गौरविण्यात आले.
पिंपरी-चिंचवड येथील आचार्य अत्रे रंगमंदिर येथे १२ जुलै रोजी पार पडलेल्या या राष्ट्रीय स्तरावरील पुरस्कार वितरण सोहळ्यात शिक्षण क्षेत्रात उत्कृष्ट, मूल्याधिष्ठित आणि नाविन्यपूर्ण कार्य करणाऱ्या देशभरातील निवडक शिक्षणतज्ज्ञांचा सन्मान करण्यात आला.या प्रसंगी महाराष्ट्राचे उच्च व तंत्रशिक्षण मंत्री चंद्रकांत पाटील, पिंपरी-चिंचवडच्या महापौर मंजुषा नागपुरे, आमदार शंकरराव जगताप, स्विफ्ट एन लिफ्ट मीडिया ग्रुपचे संस्थापक व मुख्य कार्यकारी अधिकारी निलेश साबे यांच्यासह अनेक मान्यवरांची उपस्थिती होती. मान्यवरांच्या हस्ते डॉ. पावसे यांना सन्मानचिन्ह (ट्रॉफी) व गौरवपत्र प्रदान करण्यात आले. डॉ. पावसे यांनी गेली अनेक दशके शिक्षण, समाजसेवा, साहित्य, संस्कृती, योग, पर्यावरण जनजागृती आणि विद्यार्थ्यांच्या सर्वांगीण विकासासाठी सातत्याने कार्य केले आहे. त्यांच्या या उल्लेखनीय योगदानाची दखल घेऊन त्यांना हा प्रतिष्ठेचा राष्ट्रीय पुरस्कार प्रदान करण्यात आला. या सन्मानाबद्दल विविध शैक्षणिक, सामाजिक, साहित्यिक व सांस्कृतिक संस्थांमधून तसेच मित्रपरिवार व हितचिंतकांकडून डॉ. अनिल पावसे यांच्यावर अभिनंदनाचा वर्षाव होत आहे. त्यांच्या या यशामुळे उल्हासनगर शहरासह ठाणे जिल्ह्याच्या शैक्षणिक क्षेत्राच्या शिरपेचात मानाचा तुरा खोवला गेला आहे.
