अंबरनाथ दि. १३ ( प्रमोद दळवी ) : अति उष्णता सुरू झाल्याने नागरिक नागरिक हैराण झाले आहेत. त्यात आता या अति उष्णता मुळे साप देखील थंड वातावरणाच्या ठिकाणी शिरकावणी करू लागले आहेत. नुकताच अंबरनाथ पूर्व स्टेशन जवळील फेमस मम्मास फास्ट फूड या हॉटेलमध्ये दुपारी दोनच्या सुमारास जवळपास दीड फूट लांबीचा हिरवा रंगाचा साप अचानक हॉटेलमध्ये शिरला. तो साप चक्क खुर्चीत बसून राहिला.
हॉटेल मालक मनोज मोरे यांनी या सापाला पाहताच सर्पमित्र प्रकाश गोहिल यांना या सापा बाबत माहिती दिली. हॉटेलमध्ये साप शिरल्याचे पाहून त्या ठिकाणी भीतीचे वातावरण निर्माण झाले होते. प्रकाश गोहिल यांनी त्वरित त्या हॉटेलकडे धाव घेऊन खुर्चीत बसलेल्या त्या सापाला पकडून बाटलीत भरले. पकडण्यात आलेला तो साप हरणटोळ जातीचा साप असून जवळपास दीड फुटी लांबीचा आहे. प्रकाश गोहिल यांनी त्या हरणटोळ सापा बाबत हॉटेलमधील सर्वांना माहिती दिली. हा साप विषारी आहे पण मनुष्य साठी हानिकारक नाही. हा साप नेहमी हिरव्या गार झाडावर आढळतो. जास्त करून हा झाडाच्या हिरव्या पानांमध्ये दडून बसलेला असतो. सध्या अति उष्णतेमुळे झाडावरून हे साप खाली उतरू लागले आहेत. थंडगार वातावरणाच्या ठिकाणी यांनी शिरकावणी करण्यास सुरुवात केली आहे. कदाचित हा साप देखील हॉटेलमधील थंडगार हवेच्या ठिकाणी आला असावा असे सर्पमित्र प्रकाश गोहिल यांनी सांगितले. पकडण्यात आलेल्या त्या हरणटोळ सापाला जवळच्या जंगलात सोडण्यात आले आहे.
