उल्हासनगर दि.२३ : शीखांचे नववे गुरु, गुरु तेग बहादुर (हिंद-दी-चादर) यांच्या ३५० व्या शहीदी समागम निमित्त दिनांक २३ फेब्रुवारी २०२६ रोजी सकाळी ९.०० वाजता कोकण विभागातील सर्व शैक्षणिक संस्थांमध्ये सामूहिक गीत गायन कार्यक्रम आयोजित करण्यात आला होता.
त्या अनुषंगाने उल्हासनगर महानगरपालिका क्षेत्रातील सर्व शाळांमध्येही सामूहिक गीत गायनाचा कार्यक्रम उत्साहपूर्ण वातावरणात पार पडला. विशेषतः शाळा क्र. २४ व शाळा क्र. १८ येथे महापौर सौ. अश्विनी कमलेश निकम यांच्या प्रमुख उपस्थितीत गीत गायनाचा कार्यक्रम संपन्न झाला.
महानगरपालिकेचे अतिरिक्त आयुक्त डॉ. किशोर गावस यांनी समागमाच्या ऐतिहासिक व सामाजिक महत्त्वावर भाष्य केले. या सामूहिक गीत गायन उपक्रमाची नोंद “Best of India Records” या संस्थेकडून घेण्यात येणार असल्याची माहिती त्यांनी दिली तसेच या ऐतिहासिक उपक्रमाचा आपण सर्वजण अभिमानाने भाग आहोत, असेही नमूद केले.
यावेळी महापौर सौ. अश्विनी कमलेश व महानगरपालिकेचे अधिकारी यांनी संबंधित शाळांची पाहणी केली. पाहणी दरम्यान शाळेमध्ये विद्यार्थ्यांना डिजिटल स्क्रीनच्या माध्यमातून कृत्रिम बुद्धिमत्ता (AI) तंत्रज्ञानाद्वारे दिल्या जाणाऱ्या अध्यापनाचे प्रात्यक्षिक सादर करण्यात आले. या उपक्रमाबाबत समाधान व्यक्त करत विद्यार्थ्यांच्या सर्वांगीण विकासासाठी आधुनिक तंत्रज्ञानाचा प्रभावी वापर होत असल्याचे नमूद करण्यात आले.
सदर कार्यक्रमास महानगरपालिकेचे उप-आयुक्त अनंत जवादवार, शिक्षण विभागाचे प्रशासन अधिकारी धनगर ,सहा. आयुक्त तथा जनसंपर्क अधिकारी अजय साबळे, सहा. आयुक्त गणेश शिंपी, मनिष हिवरे, सौ. सलोनी निवकर, विद्युत विभाग प्रमुख हनुमंत खरात, अभिलेखा विभाग प्रमुख अच्युत सासे, विधी विभाग प्रमुख राजा बुलानी, मुख्य स्वच्छता निरिक्षक एकनाथ पवार, सामन्य प्रशासन विभाग प्रमुख अजित गवारी, पर्यावरण विभाग दत्तात्रय जाधव, सिस्टम अॅनलिस्ट सौ. श्रध्दा बाविस्कर उपस्थित होते. कार्यक्रम शांततेत व उत्साहात यशस्वीरीत्या पार पडला.
