उल्हासनगर दि.१८ ( प्रमोद दळवी ) : बुधवारी उल्हासनगर महापालिकेत सर्वसाधारण महासभेचे आयोजन करण्यात आले होते. स्थायी समितीच्या १६ सदस्यांची निवड करण्याकरिता ही महासभा आयोजित करण्यात आली होती. त्यावेळी शिवसेना नगरसेवक सुरज सोनकांबळे यांनी त्यांच्या प्रभागात गेल्या अनेक महिन्यापासून दूषित पाणीपुरवठा होत असल्याने चक्क दूषित पाण्याने भरलेली बाटली आणून सभागृहातच महापौरांच्या समोर ठेवल्याने सभागृहात या दूषित पाण्याचा विषय गाजला.
उल्हासनगर शहरातील कम्प नंबर -४ परिसरातील लालचक्की येथे गेल्या अनेक महिन्यापासून दूषित पाणीपुरवठा होत आहे. शिवसेना नगरसेवक सुरज सोनकांबळे यांनी या दूषित पाणीपुरवठा बाबत महापालिका प्रशासनाकडे तक्रार केली होती. पण या तक्रारीची दखल घेतली गेली नसल्याने अखेर बुधवारी सभागृहात महासभा सुरू असताना नगरसेवक सुरज सोनकांबळे यांनी सोबत आणलेली दूषित पाण्याचे बाटली महापौर यांच्यासमोर जाऊन ठेवली. माझ्या प्रभागात गेल्या अनेक महिन्यापासून दूषित पाणीपुरवठा होत असल्याने नागरिक हैराण झाले आहेत. त्या परिसरातील नागरिकांचे आरोग्य धोक्यात आले असून या दूषित पाण्याबाबत प्रशासनाकडे त्यांनी तक्रार केली होती पण त्या समस्या कडे दुर्लक्ष केले जात असल्याचा आरोप नगरसेवक सुरज सोनकांबळे यांनी केला. त्यामुळे या दूषित पाण्यासंदर्भात प्रशासनाचा लक्ष वेधण्यासाठी त्यांनी सभागृहातच दूषित पाण्याने भरलेली बाटली आणली असल्याचे सांगितले. याशिवाय त्यांनी महापौर व आयुक्तांना आम्ही हे दूषित पाणी कसं प्यायचं असा प्रश्न त्यांनी उपस्थित केला. त्यामुळे या दूषित पाण्याचा प्रश्न महासभेत गाजला. त्यावेळी महापालिका आयुक्त व महापौर यांनी सुरज सोनकांबळे यांना हा दूषित पाण्याचा प्रश्न लवकर सोडविण्यात येईल. असे आश्वासन दिले.
