उल्हासनगरदि. २७ ( प्रमोद दळवी ) : उल्हासनगर शहरातील कॅम्प नंबर -३ परिसरातील छत्रपती शिवाजी महाराज चौकात छत्रपतींच्या सन्मानासाठी आणि चौकातील प्रतिमेच्या संरक्षणासाठी विविध सामाजिक व हिंदू संघटनेच्या वतीने एक दिवसीय लाक्षणिक उपोषण व आंदोलन करण्यात आले.
विविध संघटनांसह अनेक पदाधिकारी व कार्यकर्त्यांनी या आंदोलनात सहभाग घेतला होता. यामध्ये प्रीती प्रफुल भोसले, शैलेश तिवारी, तुषार बागुल, सुधीर कन्हरे, नरेशदादा थोपटे, चेतन साळुंखे, व्ही. व्ही. पाटील, सनी भाऊ तेलकर, विलास आंग्रे, सुरजीत पंजाबी, दीपक शाहू, विशाल भोसले, अमर सुपे, विकी पाटील, अनिल जेसवाल, नितीन चंदालिया, किरण पवार, वासू, राजेश तेजवानी, भीष्म असुदानी, दीपक गाडे, सचिनभाऊ साठे, राजू पाल, धनंजय मिश्रा, गणेश तिखंडे आदींचा समावेश होता.
छत्रपती शिवाजी महाराज चौक येथील प्रतिमा (राजसदर), चबुतरा व परिसराची सुरक्षा, तसेच महापालिका प्रशासनाचा कथित गलथान कारभार, कामातील दिरंगाई याविरोधात आंदोलनकर्त्यांनी तीव्र नाराजी व्यक्त केली. प्रतिमेभोवती काचेचे संरक्षक कुंपण उभारावे, कचरा व घाण रोखावी, तसेच अभिषेकाच्या नावाखाली होणारी हानी थांबवावी, अशी मागणी त्यावेळी करण्यात आली. काही दिवसांपूर्वी प्रतिमेसमोर नृत्य करून सोशल मीडियावर व्हिडिओ पोस्ट केल्याच्या घटनेवरही संताप व्यक्त करत संबंधितांवर कारवाई करून जाहीर माफी घ्यावी, अशी मागणी करण्यात आली.
याशिवाय चौकाचे अधिकृत नाव “छत्रपती शिवाजी महाराज चौक” किंवा “श्रीमंत छत्रपती शिवाजी महाराज चौक” असे सन्मानपूर्वक घोषित करावे, तसेच परिसरातील दुकानांच्या पाट्यांवरही योग्य उल्लेख करण्याचे निर्देश द्यावेत, अशी मागणी करण्यात आली. प्रतिमा व राजसदरावर वारंवार निकृष्ट दर्जाची दुरुस्ती होत असल्याचा आरोप करत संबंधित ठेकेदाराला काळ्या यादीत टाकून टिकाऊ व दर्जेदार सुशोभीकरण करावे, तसेच प्रतिमा किमान १० फूट उंच, अखंड व भव्य स्वरूपात उभारावी आणि भविष्यात अनुचित प्रकार टाळण्यासाठी CCTV कॅमेरे बसवावेत, अशी मागणी करण्यात आली.या आंदोलनाचे नेतृत्व राष्ट्रीय छावा संघटना महाराष्ट्रचे प्रदेशाध्यक्ष निखिल गोळे यांनी केले. त्यांनी प्रशासनाला इशारा देत, “छत्रपतींच्या सन्मानाशी तडजोड सहन केली जाणार नाही; मागण्या पूर्ण न झाल्यास तीव्र आंदोलन छेडण्यात येईल,” असा इशारा दिला आहे.
