उल्हासनगर, दि. १३ ( प्रमोद दळवी ) : उल्हासनगर कॅम्प क्रमांक ३ मधील गौतमवाडी परिसरातील रहिवाशांची अनेक वर्षांपासूनची मागणी अखेर पूर्णत्वास जात असून, क्रिटीकेअर हॉस्पिटल ते गुरुगोविंद शाळेकडे जाणाऱ्या महत्त्वाच्या रस्त्याच्या सिमेंट काँक्रीटकरणाच्या कामाला सुरुवात झाली आहे. या कामाचे भूमिपूजन महापौर अश्विनी कमलेश निकम आणि माजी आमदार पप्पू कलानी यांच्या हस्ते उत्साहात पार पडले.
स्थानिक नागरिकांसाठी अत्यंत महत्त्वाचा असलेला हा रस्ता अनेक वर्षांपासून खराब अवस्थेत असल्याने नागरिकांना मोठ्या अडचणींचा सामना करावा लागत होता. निवडणुकीदरम्यान नगरसेवक आकाश चक्रवर्ती आणि नगरसेविका डिंपल कुमारी ठाकूर यांनी या रस्त्याचे काँक्रीटीकरण करण्याचे आश्वासन दिले होते. व रस्त्याच्या दुरावस्थेबाबत खासदार डॉ. श्रीकांत शिंदे यांची भेट घेऊन निधीची मागणी केली. त्यांच्या पाठपुराव्यानंतर नगरविकास मंत्रालयाच्या माध्यमातून या रस्त्याच्या कामासाठी निधी उपलब्ध करून देण्यात आला आणि प्रत्यक्ष कामाला सुरुवात झाली. हा रस्ता बिग सिनेमा, कल्याण-बदलापूर मार्ग तसेच मध्यवर्ती रुग्णालयाकडे जाणाऱ्या प्रमुख मार्गाला जोडणारा असल्यामुळे येथे दिवसभर मोठ्या प्रमाणावर वाहतूक असते. त्यामुळे या रस्त्याच्या काँक्रीटीकरणामुळे वाहतूक अधिक सुरळीत होण्यासह नागरिकांना मोठा दिलासा मिळणार आहे.
यावेळी महानगर प्रमुख राजेंद्र चौधरी यांनी सांगितले की, पॅनल क्रमांक ९ मधील शिवसेनेच्या नगरसेवकांच्या सातत्यपूर्ण प्रयत्नांमुळे खासदार डॉ. श्रीकांत शिंदे यांनी या रस्त्याच्या कामासाठी सुमारे दीड कोटी रुपयांचा निधी उपलब्ध करून दिला. अनेक वर्षांपासून नादुरुस्त असलेल्या या रस्त्याचे सिमेंट काँक्रीटीकरण होत असल्याने परिसरातील नागरिकांची मोठी समस्या दूर होणार आहे. शहरातील विविध भागांमध्ये नागरिकांना मूलभूत सुविधा उपलब्ध करून देण्यासाठी सातत्याने विकासकामे सुरू असून, त्याचाच एक भाग म्हणून या कामाची सुरुवात करण्यात आली आहे. लवकरच नागरिकांना दर्जेदार सिमेंट काँक्रीटचा रस्ता उपलब्ध होईल, असा विश्वास त्यांनी व्यक्त केला. भूमिपूजन कार्यक्रमाला महानगर प्रमुख राजेंद्र चौधरी, नगरसेवक आकाश चक्रवर्ती नगरसेविका डिंपल कुमारी ठाकूर, कमलेश निकम, नरेश दुर्गाणी, सुमित चक्रवर्ती, सुंदर मुदलीयार, जमनादास पुरुषवाणी, स्थायी समिती सभापतीबिट्टू भाई कलवतसिंग सोहता यांच्यासह परिसरातील नागरिक मोठ्या संख्येने उपस्थित होते.
