अंबरनाथ दि. २ ( प्रमोद दळवी ) : अंबरनाथ मधील धर्मवीर आनंद दिघे नाट्यगृहामध्ये दिनांक १ मे ‘महाराष्ट्र दिनी’ अजित कडकडे यांच्या अमृत महोत्सवी वर्षा निमित्त त्यांचा सत्कार व “दत्ताची पालखी” या शीर्षकांतर्गत त्यांच्या भक्ती व नाट्य गीतांच्या मैफिलीचे आयोजन करण्यात आले होते. याप्रसंगी त्यांनी गणेश गीत,अबीर गुलाल अभंग, दत्ताची पालखी, घेई छंद मकरंद नाट्यगीत, स्वामी समर्थांचे गीत इत्यादी गाण्यांनी अंबरनाथकर रसिकांना मंत्रमुग्ध करून टाकले.
याप्रसंगी अंबरनाथचे माजी नगराध्यक्ष सुनील चौधरी यांनी व मान्यवर यांनी अजित कडकडे यांचा सत्कार केला. तसेच अंबरनाथ संगीत सभेचे अध्यक्ष प्रसाद मुदवेडकर यांनी सन्मानचिन्ह देऊन त्यांचे स्वागत केले. मोहन कुलकर्णी यांनी दिनांक १७ मे रोजी धर्मवीर आनंद दिघे नाट्यगृहात होणाऱ्या बाळ कोल्हटकर जन्मशताब्दी कार्यक्रमाचे त्यांना निमंत्रण दिले. आज ७५ व्या वर्षी खड्या आवाजात गाताना प्रत्येक गाण्याचा आशय व आध्यात्मिक मार्गावर चालताना जीवनात कसा अमुलाग्र बदल होतो याचे विवेचन स्वतः कडकडेजी करत होते. या कार्यक्रमाला अंबरनाथकरांनी प्रचंड दाद दिली.सत्काराला उत्तर देताना अजित कडकडे म्हणाले गेली ४० वर्षे रसिकांनी मला भरभरून दाद दिली माझ्यावर भरगोस प्रेम केले आणि आज या वयात सुद्धा अंबरनाथकरांनी ज्या पद्धतीने मला दाद दिली त्याचा मला खरंच आनंद झालेला आहे .
या सत्कार प्रसंगी डॉक्टर वसंत महाजन, सौ नीलिमा जोशी, दत्ता घावट, डॉ. सागर धाडस, निलेश पताडे, विकास पावसकर, रेवती जठार इंदुताई पाताडे ,शैला आचार्य , डॉ सुजाता महाजन, डॉ राहुल चौधरी, पराग सुळे आदी मंडळी उपस्थित होती.हा कार्यक्रम उत्साहात आणि असंख्य अंबरनाथकरांच्या उपस्थितीत पार पडला.
