उल्हासनगर दि . ३० ( प्रमोद दळवी ) : शिवसेना संसदीय गटनेते तथा कल्याण लोकसभेचे खासदार डॉ. श्रीकांत एकनाथ शिंदे यांच्या नवी दिल्ली येथील शासकीय निवासस्थानी शिवसेना महानगर प्रमुख तथा नगरसेवक राजेंद्र चौधरी यांनी सदिच्छा भेट घेतली. या भेटीदरम्यान उल्हासनगर शहराच्या विकासाशी संबंधित महत्त्वाच्या विषयांवर चर्चा करण्यात आली.यावेळी कल्याण युवासेना लोकसभा सचिव हरजिंदरसिंह (विक्की) भुल्लर, कैलास तेजी आणि युवराज भदाणे हे देखील उपस्थित होते.
भेटी दरम्यान उल्हासनगर महानगरपालिका हद्दीतील प्रभाग क्रमांक १० मधील विठ्ठलवाडी, खन्ना कंपाऊंड परिसरात शहरातील पहिली क्लस्टर डेव्हलपमेंट योजना मुंबई महानगर प्रदेश विकास प्राधिकरण (एमएमआरडीए)च्या माध्यमातून राबविण्यात यावी, अशी मागणी करणारे सविस्तर लेखी निवेदन खासदार डॉ. श्रीकांत शिंदे यांना सादर करण्यात आले. या महत्त्वाकांक्षी योजनेमुळे जुन्या व धोकादायक इमारतींचा प्रश्न मार्गी लागून नागरिकांना सुरक्षित, आधुनिक आणि नियोजनबद्ध घरे उपलब्ध होतील तसेच परिसराच्या सर्वांगीण विकासाला गती मिळेल, असा विश्वास यावेळी व्यक्त करण्यात आला.याशिवाय उल्हासनगर महानगरपालिका प्रभाग क्रमांक १० मधील बोट क्लबचा शासनाच्या निधीतून सर्वांगीण विकास करण्यात यावा यासाठीही स्वतंत्र लेखी निवेदन देण्यात आले.
