उल्हासनगर दि.२४ ( प्रमोद दळवी ): उल्हासनगरातील कॅम्प नंबर – ४ परिसरातील गुरुनानक शाळेतील दहावीतला विद्यार्थी आयुष सुरेंद्र गायकवाड ( १५) याने चंद्रपूर येथे आयोजित करण्यात आलेल्या बुडो मार्शल आर्ट कराटे राज्यस्तरीय स्पर्धेत सुवर्णपदक पटकावल्याने त्याचे सर्व स्तरातून अभिनंदन करण्यात येत आहे
आयुष सुरेंद्र गायकवाड ( १५ ) हा उल्हासनगर शहरातील कॅम्प नंबर – ४ येथील गुरुनानक शाळेतील दहावीतला विद्यार्थी आहे. अत्यंत हुशार असणाऱ्या आयुष याने शाळेतील विविध स्पर्धेत सहभाग घेऊन विविध खेळांमध्ये जवळपास दहाहून अधिक सुवर्णपदक आज पर्यत पटकावले आहेत. याशिवाय तायक्वांडो कराटेत ब्लॅक बेल्ट असून त्याने जवळपास दहाहून अधिक सुवर्णपदक पटकावले आहेत.
नुकताच सरदार पटेल महाविद्यालय महाराणा प्रताप चौक, चंद्रपूर येथे बुडो मार्शल आर्ट कराटे राज्यस्तरीय स्पर्धेचे आयोजन करण्यात आले होते. या स्पर्धेत एकूण ५ जिल्ह्यातील शालेय खेळाडू सहभागी झाले होते, १९ वर्षाखालील मुलांच्या गटातून ठाणे जिल्ह्यातील उल्हासनगर शहरातील आयुष सुरेंद्र गायकवाड याने ५४ किलो वजनी गटात या राज्यस्तरीय स्पर्धेत भाग घेऊन सुवर्णपदक पटकावले. त्याच्या या यशामुळे त्याचे उल्हासनगर शहरातून कौतुक करून सर्वत्र अभिनंदन करण्यात येत आहे. आयुष सुरेंद्र गायकवाड हा गुरुनानक शाळेतील विद्यार्थी असल्याने शारीरिक शिक्षण शिक्षक उदय पवार प्रशिक्षक शिहान नवीन ठाकूर यांच्या मार्गदर्शनाखाली त्याची राष्ट्रीय स्पर्धेसाठी निवड झाली होती. त्याने पटकावलेल्या सुवर्णपदकाच्या अतुलनीय कामगिरीबद्दल शाळेतील सर्व शिक्षक वर्गाने त्याचे अभिनंदन केले आहे.
