उल्हासनगर दि . ५ : .मंगळवारी उल्हासनगर महापालिका आयुक्त, उपविभागीय अधिकारी आणि तहसीलदार उल्हासनगर यांच्या मार्गदर्शनाखाली सर्व पर्यवेक्षक व बीएलओ यांची महत्त्वपूर्ण आढावा बैठक आयोजित करण्यात आली होती.
भारतीय निवडणूक आयोगाच्या निर्देशानुसार, मतदार याद्या अधिक पारदर्शक, अचूक आणि त्रुटीरहित करण्याच्या उद्देशाने ‘विशेष सखोल पुनरिक्षण कार्यक्रम’ (Special Intensive Revision-SIR) सध्या युद्धपातळीवर राबविण्यात येत आहे. या मोहिमेचा मुख्य संकल्प मतदार यादीतील तांत्रिक व मानवी त्रुटी पूर्णपणे दूर करणे हा आहे.
या मोहिमेअंतर्गत नियुक्त करण्यात आलेले मतदान केंद्रस्तरीय अधिकारी (BLO) आणि केंद्रस्तरीय पर्यवेक्षक यांच्यामार्फत १) प्रोजन्सी मॅपींग (Progency Mapping) : मतदान केंद्रांचे अद्ययावत नियोजन, २) DSE पडताळणी : लोकसंख्या शास्त्रीयदृष्ट्या समान आढळणाऱ्या नोंदींची (Demographically Similar Entries) खातरजमा करणे, ३) छायाचित्र सुधारणा : अस्पष्ट (Blurred) आणि मानवी नसलेली (Non-Human) छायाचित्रे बदलणे, ३) PSE दुरुस्ती : एकाच व्यक्तीचे दोनदा फोटो असलेल्या (Photo Similar Entries) नोंदी शोधून काढणे या बाबींची तपासणी व दुरुस्ती केली जात आहे.
सदर बैठकीत सहायक निवडणूक अधिकारी अजय साबळे, गणेश शिंपी. विशाल कदम, मनिष हिवरे व नायब तहसिलदार कुमावर यांनी ‘SIR’ मोहिमेची टक्केवारी वाढविण्याच्या दृष्टीने सविस्तर सूचना दिल्या. केवळ सूचना देऊन न थांबता, उपस्थित सर्व बीएलओंकडून मॅपींगची टक्केवारी वाढविण्याच्या दृष्टीने प्रत्यक्ष मॅपींगचे काम त्याच ठिकाणी करून घेण्यात आले, जेणेकरून ही मोहीम विहित वेळेत पूर्ण होईल.
