- सुरुवात बारामतीत अन् अखेरचा श्वासही बारामतीतच,
- अजित पवार अमर रहेच्या घोषणा
- मैदानात दादांच्या कार्यकर्त्यांचा आक्रोश
बारामती दि.२९ ( प्रमोद दळवी ) : राज्याच्या राजकारणात अनेकदा धक्कातंत्राचा प्रत्यय देणारे उपमुख्यमंत्री अजित पवार यांचे बुधवारी सकाळी विमान अपघातात निधन झाले. अजित पवार यांची अकाली एक्झिट अवघ्या महाराष्ट्रासाठी धक्कादायक ठरली. वक्तशीर, बोलण्यात कडक पण तितकाच मिश्कील असलेला ‘दादा माणूस’ अचानक काळाच्या पडद्याआड गेल्याने संपूर्ण महाराष्ट्र हळहळला. उपमुख्यमंत्री अजित पवार यांच्या पार्थिवावर गुरुवार, २९ जानेवारी रोजी दुपारी १२ वाजता विद्या प्रतिष्ठानच्या मैदानावर शासकीय इतमामात अंत्यसंस्कार करण्यात आले .
.“दादा परत या” हा आक्रोश केवळ शब्दांपुरता मर्यादित राहिला नव्हता, तर तो प्रत्येक बारामतीकराच्या श्वासात, प्रत्येक नजरेत उतरलेला होता. महत्त्वाचे म्हणजे त्यांच्या राजकीय कारकीर्दीची सुरुवात बारामतीतून झाली आणि शेवटचा श्वासही त्यांनी बारामतीत घेतला. ‘एकच वादा अजित दादा’, अशी घोषणा देत नागरिकांनी अजित पवारांना अखेरचा निरोप दिला. बारामतीत शासकीय इतमामात अजित पवार यांच्या पार्थिवावर अंत्यसंस्कार करण्यात आले. पत्नी सुनेत्रा पवार, पार्थ पवार, जय पवार आणि पवार कुटुंबीयांनी अजित पवारांचे अखेरचे दर्शन यावेळी घेतले.
केंद्रीय गृहमंत्री अमित शाह, केंद्रीय मंत्री नितीन गडकरी, मुख्यमंत्री देवेंद्र फडणवीस, उपमुख्यमंत्री एकनाथ शिंदे, गोव्याचे मुख्यमंत्री प्रमोद सावंत, विधानसभा अध्यक्ष राहुल नार्वेकर, आमदार सरोज अहिरे, आमदार नमिता मुंदडा, राणा जगजितसिंह, झिशान सिद्दीकी, अनिल देशमुख, सुरज चव्हाण, अमोल मिटकरी, नरेश अरोरा, सचिन अहिर ,खासदार श्रीकांत शिंदे, संजय राठोड, शंभूराज देसाई, प्रकाश आबिटकर, मंगल प्रभात लोढा, आशिष जयस्वाल, श्रीरंग बारणे, खासदार बजरंग सोनावणे, संजय दीना पाटील, माणिकराव कोकाटे ,अभिनेता रितेश देशमुख, खासदार अमोल कोल्हे, राधाकृष्ण विखे-पाटील, आमदार सुरेश धस, विजय शिवतारे, दत्ता मामा भरणे ,राज्याच्या मंत्री अदिती तटकरे, मंत्री रविंद्र चव्हाण, काँग्रेस प्रदेशाध्यक्ष हर्षवर्धन सपकाळ, मंत्री जयकुमार गोरे, राष्ट्रवादी काँग्रेस शरद पवार गटाचे जयंत पाटील, हर्षवर्धन जाधव ,माजी खासदार प्रीतम मुंडे, राज्याचे मंत्री गिरीश महाजन, काँग्रेस नेते सुशीरकुमार शिंदे, खासदार प्रणिती शिंदे विधान परिषदेच्या उपसभापती नीलम गोऱ्हे, केंद्रीय राज्यमंत्री रक्षा खडसे, आंध्र प्रदेशचे मंत्री नारा लोकेश, राज्याच्या मंत्री पंकजा मुंडे, खासदार अशोक चव्हाण ,केंद्रीय मंत्री रामदास आठवले, प्रतापराव जाधव, मुरलीधर मोहोळ, खासदार शाहू छत्रपती राज्याचे मंत्री चंद्रशेखर बावनकुळे, छगन भुजबळ यांच्याकडून अजित पवारांना शेवटची श्रद्धांजली देण्यात आली .
अजित पवारांच्या निधनामुळे आज महाराष्ट्रासह बारामती निःशब्द झाली होती. पाणावलेले डोळे आणि सुन्न झालेले चेहरे अजित पवारांच्या अंत्यदर्शनासाठी व्याकूळ झाले होते. पुण्यश्लोक अहिल्यादेवी होळकर सार्वजनिक वैद्यकीय महाविद्यालयातील प्रत्येक क्षण अंतःकरण हेलावून टाकणारा होता. आपल्या लाडक्या नेत्याचे अखेरचे दर्शन घेण्यासाठी नागरिकांनी कसलीही तमा न बाळगता बारामतीकडे धाव घेतली. कुणी दुचाकीवर, कुणी चारचाकीत, तर अनेक जण पायीच पोहचले. पश्चिम महाराष्ट्रासह राज्याच्या विविध भागांतून हजारो नागरिक, कार्यकर्ते आणि पदाधिकारी येथे दाखल झाले होते . परिसरात कुठेही गोंगाट नव्हता; मात्र त्या शांततेत दडलेला शोक अधिकच बोचरा वाटत होता. पत्नी सुनेत्रा पवार यांनी ३७ वर्षे अजितदादांबरोबर सहजीवनाचा प्रवास केला. तो आज अखेर संपला. अजितदादांना अखेरचा निरोप देताना दादा परत या..! हा आक्रोश शेवटच्या क्षणापर्यंत सुरु होता. यावेळी लाखोंच्या जनसमुदायाने अजित पवारांना अखेरचा निरोप दिला.
