अंबरनाथ, दि. २२ ( प्रमोद दळवी ) : अंबरनाथमध्ये लिव्ह-इन रिलेशनशिपमध्ये राहत असलेल्या महिलेच्या सात वर्षीय मुलाची अमानुष मारहाण करून हत्या केल्याची धक्कादायक घटना उघडकीस आली आहे. या प्रकरणी अंबरनाथ पोलिसांनी २४ वर्षीय विकास सिंह याला अटक केली असून न्यायालयाने त्याला २४ जुलैपर्यंत पोलीस कोठडी सुनावली आहे.
पोलिसांनी दिलेल्या माहितीनुसार, मृत मुलाचे नाव हसनैन उर्फ जाऊद्दीन कुरेशी (वय ७) असे असून तो अंबरनाथ पोलीस ठाण्याच्या हद्दीतील लादी नाका परिसरात आईसोबत राहत होता. गेल्या तीन महिन्यांपासून विकास सिंह हा संबंधित महिलेसोबत लिव्ह-इन रिलेशनशिपमध्ये राहत होता. प्राथमिक तपासात समोर आलेल्या माहितीनुसार, हसनैन हा आपल्या संबंधांमध्ये पुढे अडथळा ठरू शकतो, अशी भावना विकासच्या मनात निर्माण झाली होती. १७ जुलै रोजी मुलाची आई घराबाहेर गेल्यानंतर विकासने घरातील लाटण्याने हसनैनच्या गुप्तांगांसह शरीराच्या विविध भागांवर क्रूरपणे मारहाण केली. त्यानंतर लाथाबुक्क्यांनीही त्याला गंभीर जखमी केले.
घटनेनंतर स्वतःवर संशय येऊ नये म्हणून विकासने जखमी मुलाला प्रथम उल्हासनगर येथील मध्यवर्ती रुग्णालयात दाखल केले. मात्र प्रकृती अत्यंत गंभीर असल्याने डॉक्टरांनी त्याला पुढील उपचारासाठी मुंबईतील केईएम रुग्णालयात हलविले. उपचार सुरू असताना २१ जुलै रोजी हसनैनचा मृत्यू झाला.दरम्यान, सुरुवातीला विकासने अंबरनाथ पोलिसांना एका अज्ञात व्यक्तीने मुलावर हल्ला केल्याची खोटी माहिती दिली होती. मात्र घटनाक्रमातील विसंगती आणि त्याच्या हालचाली संशयास्पद वाटल्याने पोलिसांनी त्याला ताब्यात घेऊन सखोल चौकशी केली. चौकशीत त्याने गुन्ह्याची कबुली दिल्याचे पोलिसांनी सांगितले.
तपासात विकास हा मुलाच्या आईसोबत काही महिन्यांपासून लिव्ह-इन रिलेशनशिपमध्ये राहत असल्याचे स्पष्ट झाले. हसनैन हा भविष्यात आपल्या संबंधांमध्ये अडथळा ठरेल, या संशयातून त्याच्यावर अत्यंत क्रूरपणे हल्ला करण्यात आल्याचे तपासात समोर आले आहे.या प्रकरणी अंबरनाथ पोलीस ठाण्यात विकास सिंह याच्याविरुद्ध खुनाचा गुन्हा दाखल करण्यात आला असून त्याला अटक करण्यात आली आहे. न्यायालयाने त्याला २४ जुलैपर्यंत पोलीस कोठडी सुनावली आहे. सहाय्यक पोलीस आयुक्त शैलेश काळे यांच्या मार्गदर्शनाखाली, वरिष्ठ पोलीस निरीक्षक शब्बीर सैय्यद यांच्या नेतृत्वात सहाय्यक पोलीस निरीक्षक सुभाष पानसरे अधिक तपास करीत आहेत.
