उल्हासनगर दि ३० : उल्हासनगर मधील हिललाईन पोलीस ठाण्याच्या हद्दीतील अंबरनाथ तालुक्यातील कुशिवली गावातील छोटी टेकडी जवळील जंगलात एका तरुण जोडप्याचा झाडाला गळफास घेतलेल्या अवस्थेत मृतदेह पोलिसांना मिळून आला आहे. ते दोघे प्रियकर प्रियसी असल्याचा प्राथमिक अंदाज पोलिसांनी वर्तवला आहे.
पोलीस सूत्राने दिलेल्या माहितीनुसार अंबरनाथ तालुक्यातील कुशिवली गावाजवळील खडी मशीन परिसरातील छोटी टेकडी येथे एका विलायची चिंचेचा झाडाला एका तरुण-तरुणीचा गळफास घेतलेल्या अवस्थेत मृतदेह लटकत असल्याची माहिती शुक्रवारी सकाळी हिललाईन पोलिसांना मिळाली. पोलिसांनी घटनास्थळी जाऊन त्या दोघांचेही मृतदेह ताब्यात घेतले. दोन्ही मृतदेह पोस्टमार्टम साठी उल्हासनगरतील मध्यवर्ती रुग्णालयात पाठवण्यात आले. पोलिसांनी त्या दोघांबाबत चौकशी केली असता त्या तरुणाचे नाव विवेक (२०) व तरुणीचे नाव मानसी (२१) असल्याचे तपासात समजले. दोघेही अंबरनाथ तालुक्यातील चिंचपाडा गाव परिसरात त्या ठिकाणी गेल्या चार महिन्यापासून राहत असल्याचे समजले. दोघांनीही चिंचेचा झाडाला नायलॉनच्या दोरीने गळफास घेऊन आत्महत्या का केली याचा तपास पोलिसांनी सुरू केला आहे. याप्रकरणी हिललाईन पोलीस ठाण्यात अकस्मात मृत्यूची नोंद दाखल करण्यात आली आहे. दोघांनीही प्रेमप्रकरणातून ही आत्महत्या केली असावी असा अंदाज पोलिसांनी वर्तवला आहे. अधिक तपास पोलीस उप निरीक्षक सुरेवाढ करीत आहेत.
