अंबरनाथ दि.५ ( प्रमोद दळवी ) : अंबरनाथ विधानसभा मतदारसंघातील कामगार वर्गाला शासकीय योजनांचा थेट लाभ मिळवून देण्याच्या उद्देशाने आमदार बालाजी किणीकर विशेष पुढाकारातून आणि कामगार आयुक्तालयाच्या सहकार्याने आयोजित करण्यात आलेल्या भव्य नोंदणी अभियानात मोठ्या संख्येने उपस्थित असलेल्या कामगारांचे अधिकृत अर्ज भरून घेत त्यांना ‘कामगार कार्ड’चे (Labor Card) वाटप करण्यात आले.
या महत्त्वपूर्ण उपक्रमादरम्यान उपस्थित कामगारांना महाराष्ट्र शासनाच्या इमारत व इतर बांधकाम कामगार कल्याणकारी मंडळाच्या (BOCW) विविध कल्याणकारी योजना, आरोग्य विमा, सुरक्षा किट आणि गृहनिर्माण अनुदानाविषयी सविस्तर माहिती देण्यात आली. तसेच कामगारांच्या पाल्यांना उच्च व व्यावसायिक शिक्षणासाठी मिळणाऱ्या भरीव आर्थिक शिष्यवृत्तीचा लाभ घेऊन आपल्या मुलांचे भविष्य कसे उज्ज्वल करता येईल, या संदर्भात मार्गदर्शक विचार मांडून उपस्थित कामगार कुटुंबांना सामाजिक व आर्थिक सुरक्षिततेची ग्वाही दिली. यावेळी आमदार बालाजी किणीकर ,विधानसभा संघटक सौ.अनिताताई लोटे व महिला पदाधिकारी उपस्थित होते.
