कल्याण दि. २० ( प्रमोद दळवी ) : आंतरराष्ट्रीय योग दिनाच्या निमित्ताने ज्ञानगंगा एज्युकेशन ट्रस्टचे कला, वाणिज्य व विज्ञान पदवी महाविद्यालय येथे योगाभ्यास कार्यक्रम उत्साहात संपन्न झाला. राष्ट्रीय सेवा योजना (NSS) विभाग व क्रीडा समिती यांच्या संयुक्त विद्यमाने आयोजित करण्यात आलेल्या या कार्यक्रमास विद्यार्थी, प्राध्यापक, शिक्षकेतर कर्मचारी तसेच NSS स्वयंसेवकांचा उत्स्फूर्त प्रतिसाद लाभला.
कार्यक्रमाची सुरुवात सामूहिक योगाभ्यासाने झाली. प्रशिक्षक रसिका कुलकर्णी यांच्या मार्गदर्शनाखाली विविध योगासने, प्राणायाम आणि ध्यानधारणा यांचा सराव करण्यात आला. योगामुळे शारीरिक तंदुरुस्ती, मानसिक स्वास्थ्य आणि एकाग्रता वाढण्यास मदत होते, याविषयी उपस्थितांना मार्गदर्शन करण्यात आले.
महाविद्यालयाच्या प्राचार्या सौ. भाविका करकेरा, राष्ट्रीय सेवा योजना कार्यक्रम अधिकारी – *ऋतुराज कोचीरकर, क्रीडा संचालक आलोक पांडे तसेच प्राध्यापक, शिक्षकेतर कर्मचारी आणि विद्यार्थ्यांनी मोठ्या उत्साहाने योगाभ्यासात सहभाग घेतला. यावेळी नियमित योगाभ्यासाचे महत्त्व आणि निरोगी जीवनशैलीसाठी योगाची उपयुक्तता यावर विशेष भर देण्यात आला. राष्ट्रीय सेवा योजना स्वयंसेवकांनी कार्यक्रमाच्या आयोजनात सक्रिय सहभाग घेतला. योग दिनानिमित्त आयोजित या उपक्रमामुळे विद्यार्थ्यांमध्ये आरोग्य, शिस्त आणि सकारात्मक जीवनमूल्यांविषयी जागरूकता निर्माण झाली.
कार्यक्रमाच्या यशस्वी आयोजनासाठी राष्ट्रीय सेवा योजना विभाग, क्रीडा समिती तसेच महाविद्यालयातील सर्व शिक्षक व कर्मचाऱ्यांनी विशेष सहकार्य केले. उत्साहपूर्ण वातावरणात संपन्न झालेल्या या कार्यक्रमातून “निरोगी वार्धक्यासाठी योग” (Yoga for Healthy Aging) हा संदेश प्रभावीपणे विद्यार्थ्यांपर्यंत पोहोचविण्यात आला.
