अंबरनाथ दि. २१ ( प्रमोद दळवी ): अंबरनाथ मध्ये अंबर भरारी, सांस्कृतिक कला मंच, रोटरी क्लब ऑफ अंबरनाथ ईस्ट, इनरव्हील क्लब ऑफ अंबरनाथ, एक्स सर्विसमन असोसिएशन, योगिनी महिला मंडळ, तसेच हेरंब सेवा समिती या सर्व संस्थांनी मिळून संगीत पार्क येथे सोमवारी सायंकाळी ७.०० वाजता ज्येष्ठ गायिका आशा भोसले यांना भावपूर्ण श्रद्धांजली वाहण्याकरिता ‘सूर हरपले’ या कार्यक्रमाचे आयोजन केले होते.
सर्वप्रथम अंबरनाथ संगीत सभेचे अध्यक्ष प्रसाद मुदवेडकर माजी नगराध्यक्ष सुनील चौधरी ,श्रीनिवास वाल्मीकि,डॉ गणेश राठोड़, मोहन कुलकर्णी, दुबे यांनी प्रास्ताविक करून या कार्यक्रमाची सुरुवात केली. त्यानंतर सर्व संस्थांच्या अध्यक्षांनी आशा भोसले यांच्या विषयी दोन शब्द बोलून त्यांना श्रद्धांजली वाहिली. उपस्थित रसिकांमधून मनोहर दांडेकर, नीलिमा जोशी, विम्मी खन्ना, वैशाली कुलकर्णी, रचना दलाल, श्रीकांत कर्वे, प्राची परांजपे, सुधाकर वनगे व अनेकांनी आशा भोसले यांनी गायलेली गाणी सादर केली. प्रमोद रानडे , श्रीमती सुरेखा कुलकर्णी यांनी त्यांच्या आठवणींना उजाळा दिला. निखिल चौधरी यांनी आभार प्रदर्शन करून आशाताईंचे गीत सादर केले .
या संपूर्ण कार्यक्रमाचे आयोजन करणारे अंबरनाथचे माजी नगराध्यक्ष सुनील चौधरी यांनी सर्व संस्थांना एकत्र आणून हा कार्यक्रम आयोजित केला. संपूर्ण कार्यक्रमाचे सूत्रसंचालन प्रज्वल मुदवेडकर यांनी केले. या कार्यक्रमास अंबर भरारीचे डॉ. गणेश राठोड , दत्ता घावट तसेच हेरंब सेवा समितीचे अभय सोमण व इतर मान्यवर उपस्थित होते .या श्रद्धांजली कार्यक्रमास अंबरनाथकरांनी मोठ्या संख्येने सहभाग घेतला.
