बदलापूर दि. ३ ( प्रमोद दळवी ) : बदलापूर जवळच्या आंबेशिव गावात एका तारेच्या कुंपणाला लावलेल्या फासात अडकून बिबट्याचा मृत्यू झाल्याची घटना समोर आली आहे. शिकारीसाठी लावलेल्या फासात बिबट्या अडकण्याची जोरदार चर्चा असल्याने बिबट्याच्या मृत्यूबाबत वेगवेगळे तर्कवितर्क व्यक्त केले जात आहेत .
आंबेशिव गावाजवळच्या जंगलात रामगिरी आश्रम असून या आश्रमाला तारेचे कुंपण आहे आणि या कुंपणाला एका ठिकाणी वन्य प्राण्यासाठी फास लावण्यात आला होता. या फासात दोन दिवसांपूर्वी बिबट्या अडकला आणि त्याचा मृत्यू झाल्याचे आढळून आल्याने एकच खळबळ उडाली आहे. दरम्यान बिबट्याचा मृतदेह आढळून आल्याची माहिती मिळताच वनविभागाच्या पथकाने घटनास्थळी धाव घेत बिबट्याचा मृतदेह ताब्यात घेतला असून त्याचे शिवविच्छेदन केले आहे. अद्याप शवविच्छेदन अहवाल आलेला नसून या अहवालात बिबट्याच्या मृत्यूचे नेमके कारण स्पष्ट होणार आहे. त्यामुळे बिबट्याच्या शवविच्छेदन अहवालात कोणती माहिती पुढे येते हे महत्वाचे ठरणार आहे. हा बिबट्या दोन वर्षाचा मांदी जातीचा असल्याची माहिती समोर आली आहे. जंगलाला लागून असलेल्या भागात परवानगी नसतानाही वन्य प्राण्यांसाठी असे फासे लावले जातात त्यात अडकून आता बिबट्याचा मृत्यू झाल्याने या प्रकरणाचे गांभीर्य वाढला आहे. या घटनेबाबत बदलापूरचे आर. एफ. ओ धार्वणे यांना विचारणा केल्या असता त्यांनी सांगितले त्या ठिकाणी तारेचे कुंपण तुटलेले होते व त्या कुंपणाला कोणीतरी लावलेला फासात बिबट्या अडकून मृत्यू झाला आहे. याचा आम्ही तपास करीत असून नक्कीच यासंदर्भात कारवाई केली जाणार आहे असे त्यांनी सांगितले.
