उल्हासनगर दि ४ : उल्हासनगर महानगरपालिका आणि जिल्हा आपत्ती व्यवस्थापन प्राधिकरण ठाणे यांच्या वतीने राष्ट्रीय आपत्ती प्रतिसाद बल ( एन डी आर एफ ) आणि राज्य आपत्ती प्रतिसाद बल ( एन डी आर एफ ) यांच्या मार्गदर्शनाखाली सामुदायिक आधारित आपत्ती व्यवस्थापन प्रशिक्षण कार्यक्रम २०२६ चे आयोजन केले होते. उल्हासनगरातील कॅम्प नंबर – ३ परिसरातील सिंधू भवन सभागृह येथे शनिवारी या कार्यक्रमाचे आयोजन केले होते.
या कार्यक्रमास श्रीमती डॉ अनिता जवंजाळ, जिल्हा आपत्ती व्यवस्थापन अधिकारी , प्रशांत कुमावत, निवासी नायब तहसीलदार उल्हासनगर, सुरेंद्र पुनिया, निरीक्षक एन डी आर एस, सतीश सिंग, पीएसआय एसडिआरएफ. विशाल कदम, सहाय्यक आयुक्त आपत्ती व्यवस्थापन,गणेश शिंपी, सहाय्यक आयुक्त प्रभाग समिती – २ , श्रीमती सलोनी निवकर, सहाय्यक आयुक्त प्रभाग समिती, सुरेश बोंबे, मुख्य अग्निशमन अधिकारी, यशवंत सगळे, सुरक्षा अधिकारी हे उपस्थित होते.
कार्यक्रमाचे सूत्रसंचालन पंकज पवार, उपमुख्य अग्निशमन अधिकारी आणि राजेश घनघाव यांनी केले. तसेच या कार्यक्रमास मोठ्या प्रमाणात प्रशिक्षणार्थी म्हणून एनसीसी व एनएसएस मधील महाविद्यालयीन विद्यार्थ्यांची उपस्थिती लाभली.ज्यातून तरुणांमध्ये आपत्ती व्यवस्थापना विषयी असलेली जागरूकता आणि जबाबदारीची भावना स्पष्टपणे दिसून आली.
प्रशिक्षणादरम्यान, सहभागींना आग, भूकंप आणि पूर यांसारख्या आपत्ती प्रतिबंध तंत्र, प्रथमोपचार, आपत्कालीन प्रतिसाद प्रणाली आणि मदत कार्यांबद्दल माहिती देण्यात आली. त्यांनी प्रात्यक्षिक सरावाद्वारे वास्तविक परिस्थिती हाताळण्याचा सरावही केला. प्रशासनाने नागरिकांना आवाहन केले आहे की, त्यांनी अशा प्रशिक्षण कार्यक्रमांमध्ये शक्य तितके सहभागी होऊन स्वतःची आणि समाजाची सुरक्षा सुनिश्चित करावी, जेणेकरून कोणत्याही आपत्तीच्या वेळी जीवित आणि मालमत्तेची हानी कमीत कमी येईल.
