उल्हासनगर दि. २ ( प्रमोद दळवी ) : “हिंद-दी-चादर” श्री गुरु तेग बहादुर साहिबजी यांच्या ३५० व्या शहीदी समागम शताब्दी वर्षानिमित्त उल्हासनगर महापालिकेच्या वतीने उल्हासनगरातील सचखंड गुरुद्वारा येथे भव्य आरोग्य शिबिराचे आयोजन करण्यात आले होते. या सेवाभावी उपक्रमाला शिवसेना शहरप्रमुख तथा ज्येष्ठ नगरसेवक राजेंद्रसिंह भुल्लर महाराज यांची प्रेरणादायी उपस्थिती लाभली.
शेकडो नागरिकांनी या शिबिरात सहभाग घेत रक्तदाब, मधुमेह, सर्वसाधारण तपासणी, औषधोपचार मार्गदर्शन व वैद्यकीय सल्ल्याचा लाभ घेतला. महापालिकेच्या आरोग्य विभागातील डॉक्टर, परिचारिका, कर्मचारी; तसेच आशासेविकांनी शिस्तबद्ध नियोजन व अथक परिश्रमातून शिबिर यशस्वी केले. महिलांपासून ज्येष्ठ नागरिकांपर्यंत सर्व घटकांनी मोठ्या संख्येने उपस्थिती नोंदवली. आरोग्यविषयक जनजागृती, प्रतिबंधक उपाययोजना आणि वेळेवर तपासणीचे महत्त्व याबाबत मार्गदर्शन करण्यात आले. या शिबिराला नागरिकांचा उत्कृष्ट प्रतिसाद मिळाला.
