नाशिक दि २५ ( प्रमोद दळवी ) : वडार समाजाच्या न्याय हक्कासाठी आणि त्यांच्या विविध मागण्यांकरिता समाजसेविका रेखाताई मंजुळकर यांनी नाशिक रोड विभागीय आयुक्त कार्यालयासमोर बेमुदत धरणे आंदोलन सुरू केले होते. याशिवाय जन आक्रोश मोर्चाही काढला होता. या मोर्चाला नागरिकांचा उत्कृष्ट प्रतिसाद मिळाला. अखेर वडार समाजाच्या ज्वलंत व मूलभूत मागण्यांसाठी समाजसेविका रेखाताई मंजुळकर यांनी थेट विभागीय आयुक्त यांच्यासोबत सविस्तर आणि सकारात्मक चर्चा करून त्यांना निवेदन देण्यात आले.
यावेळी विभागीय आयुक्त यांनी स्पष्ट शब्दांत सांगितले की, भविष्यात वडार समाजावर कुठेही अन्याय झाला, किंवा वडार समाजाच्या कोणत्याही व्यक्तीला शासकीय कागदपत्रे, दाखले अथवा प्रशासनाशी संबंधित मदतीची आवश्यकता भासली, तर त्यांना पूर्ण सहकार्य करण्यात यावे असे स्पष्ट निर्देश संबंधित यंत्रणेला देण्यात येतील, असे आश्वासन त्यांनी रेखाताई मंजुळकर यांना दिले.समाजातील कोणत्याही घटकावर अन्याय झाला तर त्या व्यक्तीला न्याय मिळवून देण्यासाठी रेखाताई मंजुळकर सदैव पुढे असतील, असा ठाम विश्वास यावेळी व्यक्त करण्यात आला. या प्रसंगी रेखाताईंनी थेट विभागीय आयुक्तांनाच कार्यालयात अधिकृत निवेदन सादर केले.
