मुंबई: विविध अभियांत्रिकी आणि देखभालीची कामे करण्यासाठी मध्य रेल्वेच्या मुंबई विभागाकडून आज उपनगरीय विभागांवर मेगाब्लॉक घेण्यात येणार आहे. पश्चिम रेल्वेच्या उपनगरीय विभागात मेगाब्लॉक असणार नाही. मेन लाईनवर, माटुंगा-मुलुंड धीम्या मार्गावर सकाळी 11.05 ते दुपारी 3.55 पर्यंत ब्लॉक घेण्यात येईल. ठाण्याहून सकाळी ११.०७ ते दुपारी ३.५१ दरम्यान सुटणाऱ्या अप धिम्या मार्गावरील गाड्या मुलुंड ते माटुंगा स्थानकांदरम्यान अप जलद मार्गावर वळवण्यात येतील. या गाड्या मुलुंड, भांडुप, विक्रोळी, घाटकोपर, कुर्ला आणि सायन स्थानकात थांबतील आणि माटुंगा स्थानकावर अप धीम्या मार्गावर वळवल्या जातील. सेवा नियोजित वेळेच्या जवळपास 15 मिनिटे उशिरा पोहोचणे अपेक्षित आहे. ब्लॉक कालावधीत अप आणि डाऊन मार्गावरील विद्याविहार, कांजूर मार्ग आणि नाहूर स्थानकांवर गाड्या थांबणार नाहीत. सकाळी 11 ते सायंकाळी 5 दरम्यान सीएसएमटी येथून सुटणाऱ्या किंवा येणाऱ्या सर्व अप आणि डाऊन मार्गावरील सेवा सुमारे 15 मिनिटे उशिराने धावणे अपेक्षित आहे. हार्बर मार्गावर, सीएसएमटी-चुनाभट्टी/वांद्रे डाऊन हार्बर मार्गावर सकाळी 11.40 ते दुपारी 4.40 वाजेपर्यंत आणि चुनाभट्टी/वांद्रे-सीएसएमटी अप हार्बर मार्गावर सकाळी 11.10 ते दुपारी 4.10 वाजेपर्यंत ब्लॉक घेण्यात येईल. ब्लॉक कालावधीत पनवेल ते कुर्ला (प्लॅटफॉर्म क्र. 8) दरम्यान विशेष सेवा 20 मिनिटांच्या वारंवारतेने चालतील. हार्बर मार्गावरील प्रवाशांना आज संध्याकाळी 6 वाजेपर्यंत मेन लाइन आणि पश्चिम रेल्वेवरून प्रवास करण्याची मुभा असेल.
