जळगाव दि. ३१ ( प्रमोद दळवी ) : महाराष्ट्र लेवा पाटीदार महासंघातर्फे नुकताच श्रीकृष्ण लॉन्स,जळगाव या ठिकाणी विवाह,घटस्फोट,पुनर्विवाह या संबंधी कौटुंबिक समुपदेशन प्रशिक्षण कार्यक्रम घेण्यात आला.
या वेळी महाराष्ट्र गुजरात मधून महासंघाचे ट्रेनर,समुपदेशक मिळून एकूण ९० पदाधिकारी,सदस्य उपस्थित होते. दिवसभर चाललेल्या या प्रशिक्षण वर्गात अनुभव संपन्न ट्रेनर, समुपदेशक यांनी सभागृहाला संबोधित केले.यात अनुभव कथन,केस स्टडी आणि चर्चासत्रांचा सुद्धा सहभाग होता. या वेळी लेवा पाटीदार समाजासाठी गौरवाची बाब असलेली, नुकतीच (आय.ए. एस) झालेली,जळगाव येथील श्री.संजीव पाटील व सौं.शिल्पा पाटील यांची मुलगी, कु.नंदिनी पाटील हिचा आई वडिलांच्या उपस्थितीत पुणेरी पगडी देऊन भव्य सत्कार करण्यात आला. यावेळी त्यांनी समाजातील मुलामुलींसाठी प्रेरणात्मक मार्गदर्शन करण्याची इच्छा व्यक्त केली.
तसेच समाजासाठी दुसरी सन्मानाची बाब म्हणजे महासंघाचे सचिव दिलीप नाफडे यांचे चिरंजीव अमित नाफडे यांची जगभरातून फक्त तीस व्यक्तींमधून निवड होऊन त्यांना “एक्युमिन एंजल्स अवॉर्ड”जाहीर झाल्याबद्दल त्यांचा सुद्धा सत्कार करण्यात आला. त्याचा स्वीकार दिलीप नाफडे यांनी केला. हा कार्यक्रम यशस्वी करण्यात श्रीकृष्ण लॉन्सच्या संचालिका सौ.जयश्री ताई चौधरी पाटील यांची मोलाची मदत झाली. समाज कार्यासाठी त्यांनी भव्य सभागृह विनामुल्य उपलब्ध करून दिले त्याबद्दल त्यांचाही सत्कार करण्यात आला.कार्यक्रमाचे प्रस्ताविक महासंघाचे अध्यक्ष अरुण दादा बोरोले यांनी तर सूत्रसंचालन कोषाध्यक्ष डॉ.मिलिंद पाटील यांनी केले. महिला संयोजिका,खान्देश विभाग सौ.पुष्पा पाटील यांनी आभार व्यक्त केले.
