उल्हासनगर दि. २२ ( प्रमोद दळवी ) : उल्हासनगर महानगरपालिकेत महापौर आणि उपमहापौर यांच्या निवडीनंतर स्थायी समिती आणि विशेष समिती सभापतींच्या निवड प्रक्रिया देखील नुकताच पार पडल्या. मात्र आता स्वीकृत नगरसेवक निवड प्रक्रिया बाकी असल्याने आपल्याला स्वीकृत नगरसेवक पद मिळावं याकरिता निवडणुकीत पराभव झालेले काही व इच्छुक असलेल्या दिग्गजांची मोर्चेबांधणीला सुरुवात झाली आहे. स्वीकृत नगरसेवकाची माळ कोणाच्या गळ्यात पडणार याकडे सर्वांचे लक्ष लागले आहे.
उल्हासनगर महापालिकेच्या एकूण ७८ सदस्यांच्या संख्याबळानुसार ७ स्वीकृत नगरसेवकांची निवड केली जाणार आहे. शिवसेनेकडे एकूण ३८ नगरसेवक असल्याने त्यांचे ४ स्वीकृत नगरसेवक, तर भाजपाचे एकूण ३७ नगरसेवक असल्याने त्यांचे ३ स्वीकृत नगरसेवक निवडले जाणार आहेत. या स्वीकृत नगरसेवकाच्या पदासाठी नियमानुसार वकील, डॉक्टर, सामाजिक कार्यकर्ते व विविध क्षेत्रातील तज्ञांना संधी मिळणे अपेक्षित आहे. पण पालिका या नियमाचे पालन करणार का, किंवा स्वीकृत नगरसेवकाच्या निवडीत आपल्या मर्जीतील किंवा निवडणुकीत पराभव झालेल्या काही मा.नगरसेवकांना स्वीकृत नगरसेवक म्हणून संधी देणार का ? याकडे शहरवासींचे लक्ष लागले आहे. दुसरीकडे निवडणुकीत पराभव झालेल्या काही मा. नगरसेवकांना स्वीकृत नगरसेवक म्हणून निवडण्यापेक्षा सामाजिक क्षेत्रात उल्लेखनीय कामगिरी करणाऱ्या काही नवीन चेहऱ्यांना संधी देण्यात यावी अशी मागणी नागरिकांमधून केली जात आहे
