उल्हासनगर दि ८ ( प्रमोद दळवी ) : कल्याण लोकसभा मतदारसंघाच्या संघटनात्मक मजबुतीसाठी आणि आगामी राजकीय रणनीतीच्या दृष्टीने डोंबिवली येथे महत्त्वपूर्ण आढावा बैठक पार पडली. या बैठकीत खासदार डॉ. श्रीकांत शिंदे यांनी पदाधिकाऱ्यांशी सविस्तर संवाद साधत स्थानिक पातळीवरील संघटन अधिक बळकट करण्याचे आवाहन केले. त्या वेळी शिवसेना (उद्धव बाळासाहेब ठाकरे गट) पक्षाचे उल्हासनगर शहर प्रमुख कैलास तेजी, उपशहर प्रमुख राजू माने यांच्यासह अनेक पदाधिकारी व कार्यकर्त्यांनी शिवसेना एकनाथ शिंदे गटात प्रवेश केला
बैठकीदरम्यान खासदार डॉ. श्रीकांत शिंदे यांनी आगामी निवडणुकांच्या पार्श्वभूमीवर बूथस्तरापासून संघटन मजबूत करण्यावर भर देण्याची गरज अधोरेखित केली. कार्यकर्त्यांशी थेट संवाद साधून त्यांनी त्यांच्या अडचणी, अपेक्षा आणि सूचनाही जाणून घेतल्या. यामुळे कार्यकर्त्यांमध्ये उत्साहाचे वातावरण निर्माण झाले.दरम्यान, उल्हासनगरमध्ये मोठी राजकीय घडामोड घडली. शिवसेना (उद्धव बाळासाहेब ठाकरे गट) पक्षाचे शहर प्रमुख कैलास तेजी, उपशहर प्रमुख राजू माने, विभाग संघटक निरंजन दास, महिला शहर संघटक जया तेजी आणि उपशहर संघटक कुसुम माने यांच्यासह अनेक पदाधिकारी व कार्यकर्त्यांनी शिवसेना (एकनाथ शिंदे गट) मध्ये प्रवेश केला.
हा प्रवेश सोहळा उल्हासनगर महानगर प्रमुख राजेंद्र चौधरी यांच्या नेतृत्वाखाली पार पडला असून, खासदार डॉ. श्रीकांत शिंदे यांच्या हस्ते सर्वांचा पक्षप्रवेश करण्यात आला. या प्रवेशामुळे स्थानिक राजकारणात नवे वळण मिळण्याची शक्यता वर्तवली जात आहे.या कार्यक्रमाला खासदार नरेश म्हस्के, आमदार डॉ. बालाजी किणीकर, आमदार राजेश मोरे, युवासेना कार्याध्यक्ष पूर्वेश सरनाईक, शिवसेना उपनेते रवींद्र फाटक, उल्हासनगर महापौर अश्विनी निकम, कल्याण-डोंबिवली महापौर हर्षाली चौधरी, शिवसेना सचिव भाऊसाहेब चौधरी आणि जिल्हाप्रमुख गोपाळ लांडगे उल्हासनगर महानगर प्रमुख राजेंद्र चौधरी, शिवसेना गटनेता व नगरसेवक अरुण आशान ,नगरसेवक भूल्लर महाराज, रवींद्र निकम, यांच्यासह अनेक मान्यवर उपस्थित होते.
तसेच नगरसेवक, विभागप्रमुख, शाखाप्रमुख आणि कार्यकर्त्यांची मोठ्या संख्येने उपस्थिती पाहायला मिळाली. या सर्व घडामोडींमुळे कल्याण लोकसभा मतदारसंघातील राजकीय समीकरणांमध्ये बदल होण्याची शक्यता व्यक्त केली जात आहे. आगामी निवडणुकांच्या पार्श्वभूमीवर ही घटना निर्णायक ठरू शकते, असे राजकीय विश्लेषकांचे मत आहे.
