ठाणे दि. ३ ( प्रमोद दळवी ) : ज्ञानगंगा एज्युकेशन ट्रस्ट संचालित कॉलेज ऑफ एज्युकेशन (बी.एड.), ठाणे येथे ‘Preparing Learning Resources’ (शैक्षणिक साधने तयार करणे) या विषयावरील एकदिवसीय कार्यशाळा उत्साहात संपन्न झाली. या कार्यशाळेस प्रमुख पाहुणे म्हणून अगस्त्य इंटरनॅशनल फाउंडेशनचे समन्वयक प्रदीप कसुर्डे उपस्थित होते.
कार्यक्रमाची सुरुवात दीपप्रज्वलनाने करण्यात आली. प्रथम वर्ष बी.एड.च्या विद्यार्थी-शिक्षकांनी प्रभावी सूत्रसंचालन केले. कार्यशाळेच्या समन्वयक सहाय्यक प्राध्यापिका डॉ. कविता कांबळे यांनी प्रमुख पाहुण्यांचा परिचय करून दिला. महाविद्यालयाच्या प्रभारी प्राचार्या सौ. सविता उपासनी यांच्या हस्ते प्रदीप कसुर्डे यांचा पुष्पगुच्छ व स्मृतिचिन्ह देऊन सत्कार करण्यात आला. यावेळी सहाय्यक प्राध्यापिका प्रा. प्रतिभा कांबळी आणि सौ. सुरभी सोना यांचीही प्रमुख उपस्थिती होती. आपल्या मार्गदर्शनात कसुर्डे यांनी अगस्त्य इंटरनॅशनल फाउंडेशनच्या विविध शैक्षणिक उपक्रमांची माहिती दिली. तसेच POSH Act आणि POCSO Act संदर्भात विद्यार्थ्यांमध्ये जनजागृती केली. अध्यापनात शैक्षणिक साधनांचे महत्त्व, कमी खर्चात प्रभावी अध्यापन साहित्य तयार करण्याच्या पद्धती, तसेच विद्यार्थ्यांचा सक्रिय सहभाग वाढविण्यासाठी Learning Resources चा प्रभावी वापर कसा करावा, याविषयी त्यांनी सविस्तर मार्गदर्शन केले.
कार्यशाळेदरम्यान विद्यार्थी-शिक्षकांचे गट तयार करून विविध कृतींच्या माध्यमातून नाविन्यपूर्ण शैक्षणिक साधने तयार करून घेण्यात आली. संवादात्मक पद्धतीने प्रश्नोत्तरांचे सत्र घेऊन विद्यार्थ्यांच्या शंकांचे निरसन करण्यात आले. या प्रत्यक्ष कृतींमुळे विद्यार्थी-शिक्षकांमध्ये सर्जनशीलता, अध्यापन कौशल्य, आत्मविश्वास आणि प्रभावी शैक्षणिक साधने तयार करण्याची क्षमता विकसित झाली. ही कार्यशाळा अत्यंत ज्ञानवर्धक, उपयुक्त आणि प्रेरणादायी ठरली. कार्यक्रमास महाविद्यालयातील प्राध्यापक व विद्यार्थी-शिक्षकांची उत्स्फूर्त उपस्थिती लाभली. शेवटी उपस्थित मान्यवर, प्राध्यापक आणि विद्यार्थी-शिक्षकांचे आभार मानून कार्यक्रमाची सांगता करण्यात आली.
