उल्हासनगर दि. ८ ( प्रमोद दळवी ) : विद्यार्थ्यांना शिक्षणासाठी आवश्यक शासकीय दाखले सहज उपलब्ध व्हावेत तसेच ज्येष्ठ नागरिकांना ज्येष्ठ नागरिक कार्ड मिळविण्याची प्रक्रिया सुलभ व्हावी, या उद्देशाने महिला व बालविकास समितीच्या सभापती तथा शिवसेना नगरसेविका श्रीमती मीना सोंडे यांच्या पुढाकाराने बुधवारी ज्येष्ठ नागरिक कार्ड व शासकीय दाखले शिबिराचे आयोजन करण्यात आले.
उल्हासनगर कॅम्प क्रमांक ५, कुर्ला कॅम्प, रवींद्रनगर येथील मीना सोंडे यांच्या कार्यालयात हे शिबिर पार पडले. उल्हासनगर तहसील कार्यालयाच्या सहकार्याने आयोजित या शिबिराला नागरिकांचा उत्स्फूर्त प्रतिसाद लाभला. बुधवारी सकाळी ११ ते दुपारी ३ या वेळेत आयोजित शिबिरात शहरातील ६२ हून अधिक विद्यार्थ्यांनी उत्पन्नाचा दाखला, रहिवासी दाखला आदी शिक्षणासाठी आवश्यक शासकीय दाखल्यांसाठी अर्ज भरले. तसेच मोठ्या संख्येने ज्येष्ठ नागरिकांनी ज्येष्ठ नागरिक कार्ड मिळविण्यासाठी आवश्यक कागदपत्रांची पूर्तता करून अर्ज सादर केले.
या शिबिरात अर्ज केलेल्या लाभार्थ्यांना आवश्यक शासकीय दाखले व ज्येष्ठ नागरिक कार्ड लवकरच वितरित करण्यात येणार असल्याची माहिती नगरसेविका मीना सोंडे यांनी दिली. तसेच या उपक्रमासाठी उल्हासनगर तहसील कार्यालयातील अधिकारी व कर्मचाऱ्यांचे मोलाचे सहकार्य लाभल्याबद्दल त्यांनी आभार व्यक्त केले. नायब तहसीलदार यांच्या हस्ते पात्र लाभार्थ्यांना शासकीय दाखले व ज्येष्ठ नागरिक कार्डांचे वितरण करण्यात येणार असल्याचेही सांगण्यात आले. विद्यार्थी आणि ज्येष्ठ नागरिकांची गैरसोय टाळण्यासाठी अशा प्रकारचे उपक्रम भविष्यातही सातत्याने राबविण्यात येतील, असा विश्वास मीना सोंडे यांनी व्यक्त केला.
