ठाणे दि.१४ : ज्ञानगंगा एज्युकेशन ट्रस्टचे नर्सिंग महाविद्यालय (जी.एन.एम.), ठाणे येथे दिनांक २८ फेब्रुवारी २०२६ रोजी डीजीईटी ऑडिटोरियममध्ये “मराठी भाषा गौरव दिन” मोठ्या उत्साहात आणि दिमाखात साजरा करण्यात आला. मराठी भाषेच्या समृद्ध परंपरेचा गौरव करण्यासाठी तसेच विद्यार्थ्यांमध्ये मराठी भाषेबद्दल अभिमानाची भावना निर्माण करण्याच्या उद्देशाने या कार्यक्रमाचे आयोजन करण्यात आले होते.
या कार्यक्रमासाठी प्रमुख पाहुण्या म्हणून श्रीमती तपस्या नेवे, ग्रंथपाल, अंबरनाथ नगर परिषद संचालित शिव प्रेरणा ग्रंथालय व साहित्य संशोधन केंद्र, अंबरनाथ या उपस्थित होत्या. त्यांच्या उपस्थितीमुळे कार्यक्रमाला विशेष उत्साह प्राप्त झाला. कार्यक्रमात नर्सिंग विभागातील विद्यार्थ्यांनी विविध सांस्कृतिक उपक्रमांचे सादरीकरण केले. यामध्ये मराठी कविता, भारूड, गाणी तसेच नृत्य सादरीकरणांचा समावेश होता. या उपक्रमांमधून विद्यार्थ्यांनी मराठी संस्कृतीची समृद्ध परंपरा आणि कलात्मक अभिव्यक्ती प्रभावीपणे सादर केली.तसेच छत्रपती शिवाजी महाराज जयंतीचे औचित्य साधून विद्यार्थ्यांनी “पोवाडा” या लोककलेचे सामूहिक सादरीकरण केले. या सादरीकरणातून छत्रपती शिवाजी महाराजांच्या पराक्रमाची आणि शौर्यगाथेची प्रभावी झलक प्रेक्षकांसमोर उभी राहिली. पोवाडा सादर करणाऱ्या विद्यार्थ्यांना विशेष गौरविण्यात आले.कार्यक्रमाचे सूत्रसंचालन उपप्राचार्या सौ. कल्याणी तेजे यांनी प्रभावीपणे केले.
कार्यक्रमाच्या प्रारंभी ज्ञानगंगा नर्सिंग महाविद्यालयाच्या प्राचार्या सौ. शशिकला थोटा, तसेच ज्ञानगंगा शिक्षणशास्त्र महाविद्यालयाच्या प्राचार्या सौ. सविता उपासनी आणि जनसंपर्क अधिकारी (PRO) प्रा. अनिल आठवले यांनी प्रमुख पाहुण्यांचे स्वागत केले. यावेळी नर्सिंग महाविद्यालयाच्या वतीने प्रमुख पाहुण्यांचा शाल, तुळशीचे रोप आणि स्नेहभेट देऊन सन्मान करण्यात आला.कार्यक्रमाच्या शेवटी प्रमुख पाहुण्या श्रीमती तपस्या नेवे यांनी विद्यार्थ्यांना मराठी भाषेचे महत्त्व, वाचनसंस्कृतीची गरज आणि साहित्याशी नाते जोडण्याचे महत्त्व याबाबत मार्गदर्शन केले. त्यांच्या प्रेरणादायी विचारांमुळे विद्यार्थ्यांमध्ये मराठी भाषेबद्दल अधिक अभिमान निर्माण झाला.कार्यक्रमाची सांगता आभार प्रदर्शनाने करण्यात आली. या कार्यक्रमामुळे विद्यार्थ्यांमध्ये मराठी भाषा, साहित्य आणि संस्कृतीविषयी आदर व अभिमानाची भावना अधिक दृढ झाली.
