उल्हासनगर दि.२९ ( प्रमोद दळवी ) : उल्हासनगर – अंबरनाथ रेल्वे स्थानकांदरम्यान कर्जतकडे जाणाऱ्या मार्गावरील रेल्वे रुळावर मंगळवारी सायंकाळी एक जड लोखंडी चौकोनी बॉक्स आढळल्याने खळबळ उडाली. सीएसटीकडे धावणाऱ्या लोकल रेल्वीच्या मोटरमन आणि गार्ड यांच्या प्रसंगावधानामुळे संभाव्य मोठा रेल्वे अपघात टळल्याची घटना घडली आहे.
मिळालेल्या माहितीनुसार, मंगळवारी सायंकाळच्या सुमारास उल्हासनगर – अंबरनाथ स्थानकांदरम्यान कर्जतकडे जाणाऱ्या रेल्वे रुळावर कोणीतरी एक मोठा व जड लोखंडी चौकोनी बॉक्स ठेवला होता. उल्हासनगर रेल्वे स्थानकाजवळून जात असताना सीएसटी लोकलच्या मोटरमनच्या ही बाब निदर्शनास आली. त्यांनी तत्काळ गार्डला याबाबत माहिती दिली. त्यानंतर तातडीने लोकल थांबविण्यात आली. रेल्वे कर्मचारी आणि प्रवाशांच्या मदतीने संबंधित लोखंडी बॉक्स रेल्वे रुळावरून उचलून सुरक्षितपणे बाजूला करण्यात आला. त्यामुळे पुढील गाड्यांचा मार्ग मोकळा झाला आणि संभाव्य दुर्घटना टळली.
या घटनेची माहिती तातडीने रेल्वे सुरक्षा बल (RPF) तसेच शासकीय रेल्वे पोलीस (GRP) यांना देण्यात आली. संबंधित बॉक्स वेळेत हटविण्यात आला नसता तर तो लोकल किंवा एक्स्प्रेस गाडीच्या कॅटल गार्डला अडकून गंभीर अपघात होण्याची शक्यता नाकारता येत नव्हती. दरम्यान, हा लोखंडी बॉक्स रेल्वे रुळावर कोणी ठेवला, तो तेथे कशासाठी आणण्यात आला होता आणि त्यामागे घातपाताचा अथवा अपघात घडवून आणण्याचा कोणताही हेतू होता का, याचा सखोल तपास रेल्वे पोलीस आणि संबंधित यंत्रणांकडून सुरू करण्यात आला आहे. या घटनेमुळे रेल्वे सुरक्षेचा मुद्दा पुन्हा एकदा ऐरणीवर आला असून, रेल्वे परिसरात संशयास्पद वस्तू अथवा हालचाली आढळल्यास तातडीने रेल्वे प्रशासनाला माहिती देण्याचे आवाहन करण्यात येत आहे.
