- नागरिकांना मिळणार अधिक सुलभ, गुणवत्तापूर्ण आणि नागरिकाभिमुख प्राथमिक आरोग्यसेवा
उल्हासनगर दि.१५ ( प्रमोद दळवी ) : उल्हासनगर महानगरपालिका क्षेत्रातील नागरिकांना त्यांच्या परिसरातच सुलभ, दर्जेदार आणि गुणवत्तापूर्ण प्राथमिक आरोग्यसेवा उपलब्ध करून देण्याच्या दृष्टीने महत्त्वपूर्ण पाऊल उचलण्यात आले आहे. महानगरपालिका क्षेत्रात नव्याने सुरू करण्यात आलेल्या ८ नागरी आरोग्य वर्धिनी केंद्रांचे लोकार्पण महाराष्ट्राचे सार्वजनिक आरोग्य व कुटुंब कल्याण मंत्री प्रकाश आबिटकर यांच्या अध्यक्षतेखाली व्हिडिओ कॉन्फरन्सिंगद्वारे उत्साहपूर्ण वातावरणात करण्यात आले. या कार्यक्रमास आमदार कुमार आयलानी आणि माजी आमदार पप्पू कलानी यांची प्रमुख उपस्थिती होती. तसेच या उपक्रमासाठी विशेष प्रयत्न करणाऱ्या आरोग्य सभापती सौ. सविता ताई तोरणे रगडे आणि शिवाजी रगडे यांचीही प्रमुख उपस्थिती होती. यावेळी सभापती प्रेरणा माखीजानी, मुख्य वैद्यकीय अधिकारी डॉ. सत्यन गुप्ता, वैद्यकीय अधिकारी, आरोग्य विभागातील अधिकारी व कर्मचारी उपस्थित होते.
नागरिकांच्या घराजवळच मिळणार आरोग्यसेवा
नव्याने सुरू झालेल्या ८ नागरी आरोग्य वर्धिनी केंद्रांमुळे नागरिकांना प्राथमिक आरोग्य सेवेसाठी दूरवर जाण्याची आवश्यकता कमी होणार आहे. या केंद्रांमधून नागरिकांना तपासणी, प्राथमिक उपचार, आरोग्य मार्गदर्शन तसेच विविध प्राथमिक आरोग्य सुविधांचा लाभ त्यांच्या परिसरातच उपलब्ध होणार आहे. विशेषतः ज्येष्ठ नागरिक, महिला, बालके तसेच नियमित आरोग्य तपासणीची आवश्यकता असलेल्या नागरिकांसाठी ही केंद्रे महत्त्वाची ठरणार आहेत. प्राथमिक स्तरावरच आरोग्यविषयक समस्या ओळखून आवश्यक उपचार व पुढील वैद्यकीय मार्गदर्शन उपलब्ध करून देण्यास या केंद्रांची मदत होणार आहे.
“आरोग्य सेवा ही सुविधा नसून नागरिकांचा अधिकार”
“आरोग्य सेवा ही सुविधा नसून नागरिकांचा अधिकार आहे” या भूमिकेतून उल्हासनगर महानगरपालिकेच्या आरोग्य विभागामार्फत नागरिककेंद्रित आरोग्य व्यवस्था अधिक सक्षम करण्यावर भर देण्यात येत आहे. नव्या आरोग्य वर्धिनी केंद्रांच्या माध्यमातून आरोग्यसेवा अधिक व्यापक, सुलभ आणि सर्वसमावेशक करण्याचा प्रयत्न करण्यात आला आहे. कार्यक्रमादरम्यान आरोग्य विभागातील अधिकारी व कर्मचाऱ्यांशी संवाद साधण्यात आला. शहरातील विद्यमान आरोग्य सेवांचा दर्जा अधिक उंचावणे, नागरिकांना आवश्यक त्या सुविधा प्रभावीपणे उपलब्ध करून देणे तसेच प्राथमिक आरोग्य व्यवस्थेला अधिक सक्षम करण्यासाठी आवश्यक उपाययोजनांवर यावेळी चर्चा करण्यात आली.
आरोग्यसेवांच्या विस्ताराला मिळणार चालना
उल्हासनगर शहरात ८ नवीन नागरी आरोग्य वर्धिनी केंद्रांची भर पडल्याने महानगरपालिकेच्या प्राथमिक आरोग्यसेवेचे जाळे अधिक व्यापक होणार आहे. नागरिकांना त्यांच्या परिसरातच आरोग्य सुविधा उपलब्ध झाल्याने वेळ आणि प्रवासाचा खर्च वाचण्यास मदत होणार असून, प्राथमिक उपचारांसाठी मोठ्या आरोग्य केंद्रांवरील अवलंबित्वही कमी होण्याची अपेक्षा आहे. या केंद्रांमुळे आरोग्यसेवा केवळ उपचारांपुरती मर्यादित न राहता नागरिकांमध्ये आरोग्यविषयक जागरूकता निर्माण करणे, वेळेवर तपासणी करणे आणि आवश्यकतेनुसार पुढील उपचारांसाठी मार्गदर्शन करणे यालाही चालना मिळणार आहे. उल्हासनगर महानगरपालिकेच्या या उपक्रमामुळे “नागरिकांच्या दारी आरोग्य सेवा” ही संकल्पना अधिक प्रभावीपणे साकार होण्यास मदत होणार आहे. शहरातील विविध भागांतील नागरिकांना त्यांच्या जवळच्या आरोग्य वर्धिनी केंद्रातून प्राथमिक आरोग्य सुविधा मिळणार असल्याने आरोग्यसेवेची उपलब्धता आणि पोहोच वाढणार आहे.
