नवी मुंबई : ज्येष्ठ सामाजिक कार्यकर्ते आणि पत्रकारितेतील बुलंद आवाज म्हणून सुपरिचित असलेले तुर्भेकर अंकुश वैती यांनी नुकतच आपल्या कार्यकर्त्यांसह महाराष्ट्र राज्याचे उपमुख्यमंत्री एकनाथ शिंदे यांच्या उपस्थितीत शिवसेनेत प्रवेश केला.
अंकुश वैती हे शिवछाया मित्रमंडळाच्या नवी मुंबईतील पहिल्या सार्वजनिक गणेशोत्सव मंडळाचे अध्यक्ष असून नवी मुंबईतील एक ज्येष्ठ पत्रकार तसेच हाडाचे सामाजिक कार्यकर्ते म्हणून सुपरिचित आहेत. त्यांनी तीन तपांहून अधिक काळ येथील समस्यांना प्रामाणिकपणे उत्तरे शोधताना येथे अनेक समाजाभिमुख उपक्रम राबविलेले आहेत; परंतु येथे सामाजिक, सांस्कृतिक, शैक्षणिक, कला – क्रीडा क्षेत्रात काम करीत असताना प्रस्थापितांकडून सतत मर्यादा आणि अवहेलनाच वाट्याला आलेली आहे. या मुळेच शिवसेनेत प्रवेश करीत असल्याचे सांगून यापुढे पक्षवाढीसाठी व नवी मुंबईकरांच्या सर्वांगीण उन्नतीसाठी एक सामान्य शिवसैनिक म्हणून आता अधिक जोमाने काम करणार असल्याचे अंकुश वैती यांनी सांगितले.
