कल्याण दि. ८ : महापुरुषांच्या विचारांचा प्रसार, समाजप्रबोधन आणि सामाजिक कार्याला चालना देण्याच्या उद्देशाने कल्याण येथील आचार्य अत्रे नाट्यगृहात नुकत्याच संपन्न झालेल्या “महापुरुषांना संगीतिमय मानवंदना” या भव्य कार्यक्रमात विविध क्षेत्रातील मान्यवरांचा “समाजभूषण पुरस्कार” देऊन गौरव करण्यात आला. मात्र काही मान्यवरांना अत्यावश्यक शासकीय कामे व इतर पूर्वनियोजित कार्यक्रमांमुळे मुख्य सोहळ्यास उपस्थित राहता आले नाही. अशा मान्यवरांचा सन्मान आयोजकांनी त्यांच्या कार्यालयात व निवासस्थानी प्रत्यक्ष भेट देऊन केला.
यामध्ये ज्येष्ठ पत्रकार व अन्याय विरुद्ध संघर्ष समितीचे संस्थापक अध्यक्ष दिलीप मालवणकर, परिमंडळ-४ चे पोलीस उपायुक्त सचिन गोरे, विठ्ठलवाडी पोलिस निरीक्षक चंद्रहार गोडसे, पोलिस हवालदार निलेश कांगणे, सार्वजनिक बांधकाम विभागाचे अभियंता प्रशांत मानकर, केडीएमसीचे सहाय्यक आयुक्त राजेंद्र साळुंखे, समाजसेवक सुरेश सोनवणे तसेच धम्म उपासक लताताई एस. पडघान, समाजसेवक संजय शेठ गायकवाड,यांचा विशेष सन्मान करण्यात आला.
या गौरव सोहळ्यात बिग बॉस मराठी फेम लोकप्रिय कलाकार संतोष चौधरी (दादूस) यांनी स्वतः उपस्थित राहून पुरस्कार प्रदान करण्यास सहभाग नोंदवला. आयोजक सतीश अप्पा सोनवणे, बहुजन मुक्ती पार्टीचे संघर्षयोद्धा निलेशदादा येलवे, अतुल भोईर, पत्रकार सुरेश जगताप आणि प्रशांत ढोणे यांनी मान्यवरांच्या भेटी घेत त्यांना सन्मानचिन्ह, स्मृतिचिन्ह व पुष्पगुच्छ देऊन गौरविले.
या प्रसंगी मान्यवरांनी आयोजकांच्या या उपक्रमाचे विशेष कौतुक करत, “कार्यक्रमाला उपस्थित राहता आले नाही तरी आयोजकांनी घरी येऊन सन्मान केल्याने पुरस्काराचा मान अधिक वाढला,” अशा भावना व्यक्त केल्या. “महापुरुषांना संगीतिमय मानवंदना” या कार्यक्रमातून समाजप्रबोधन, सांस्कृतिक जतन आणि सामाजिक कार्याचा संदेश देण्यात आला. त्याचबरोबर “समाजभूषण पुरस्कार” हा केवळ सन्मान नसून समाजासाठी निःस्वार्थपणे कार्य करणाऱ्या व्यक्तींच्या योगदानाची कृतज्ञ दखल असल्याचे या उपक्रमातून पुन्हा अधोरेखित झाले.
