शहाड दि. १८ ( प्रमोद दळवी ) : कल्याण चॅरिटी ट्रस्टच्या पुढाकाराने आणि सेंच्युरी रेयॉन, बी. के. बिर्ला कॉलेज, बी. के. बिर्ला नाईट कॉलेज, बी. के. बिर्ला पब्लिक स्कूल, बी. के. बिर्ला प्ले स्कूल तसेच सरला बिर्ला हायस्कूल यांच्या संयुक्त विद्यमाने आषाढी एकादशीच्या पावन निमित्ताने ‘ज्ञान दिंडी – स्वच्छता आणि पर्यावरण जागर’ या विशेष जनजागृती उपक्रमाचे आयोजन करण्यात आले आहे.
ही ज्ञान दिंडी शनिवार, दि. २५ जुलै २०२६ रोजी सकाळी ८.३० वाजता बी. के. बिर्ला कॉलेज, शहाड येथून प्रारंभ होऊन विठ्ठल मंदिर, शहाड येथे समारोप होणार आहे. या दिंडीद्वारे स्वच्छता, पर्यावरण संवर्धन, वृक्षसंवर्धन आणि सामाजिक उत्तरदायित्वाचा संदेश नागरिकांपर्यंत पोहोचविण्यात येणार आहे.
दिंडीत विद्यार्थी, शिक्षक, पालक, सामाजिक कार्यकर्ते, विविध संस्थांचे प्रतिनिधी तसेच नागरिक मोठ्या संख्येने सहभागी होणार असून, पारंपरिक वारकरी संस्कृतीची झलक आणि सामाजिक संदेश यांचा सुंदर संगम या उपक्रमात अनुभवायला मिळणार आहे. घोषवाक्ये, जनजागृती फलक आणि पर्यावरणपूरक संदेशांच्या माध्यमातून नागरिकांना स्वच्छता व पर्यावरण संरक्षणासाठी प्रेरित केले जाणार आहे. या उपक्रमात सहभागी होऊन समाजात स्वच्छता, हरित पर्यावरण आणि सामाजिक बांधिलकीचा संदेश अधिक प्रभावीपणे पोहोचविण्यासाठी आयोजकांनी सर्व नागरिकांना मोठ्या संख्येने उपस्थित राहण्याचे आवाहन केले आहे.
