उल्हासनगर दि. ८ ( प्रमोद दळवी ) : सिंधू यूथ सर्कल, उल्हासनगरच्या महिला विंगच्या वतीने भारतीय सैन्यातील अधिकारी तसेच मिस इंटरनॅशनल इंडिया २०२३ विजेत्या लेफ्टनंट कशिश मेथवानी यांच्या सन्मानार्थ भव्य सत्कार समारंभाचे आयोजन करण्यात आले.
या कार्यक्रमाला उल्हासनगरचे लोकप्रिय आमदार कुमार आयलानी प्रमुख पाहुणे म्हणून उपस्थित होते. त्यांनी लेफ्टनंट कशिश मेथवानी यांचा पुष्पगुच्छ व स्मृतिचिन्ह देऊन सत्कार केला आणि त्यांच्या उज्ज्वल भविष्यासाठी शुभेच्छा दिल्या. यावेळी बोलताना आमदार कुमार आयलानी म्हणाले की, लेफ्टनंट कशिश मेथवानी यांनी भारतीय सैन्यात सेवा देत देशाचा गौरव वाढवला आहे. तसेच मिस इंटरनॅशनल इंडिया २०२३ हा किताब पटकावून त्यांनी समाजातील तरुणींना प्रेरणा दिली आहे. देशसेवा, शिस्त आणि कर्तृत्व यांचा आदर्श त्यांनी समाजासमोर ठेवला असून, अशा युवा व्यक्तिमत्त्वांचा समाजाला अभिमान आहे, असेही त्यांनी नमूद केले.
या कार्यक्रमास सिंधू यूथ सर्कलचे सुंदर डंगवानी, गुलशन लुल्ला यांच्यासह संस्थेचे पदाधिकारी, महिला विंगच्या सदस्य, समाजातील मान्यवर नागरिक तसेच मोठ्या संख्येने युवक-युवती उपस्थित होते. उपस्थितांनी लेफ्टनंट कशिश मेथवानी यांच्या उल्लेखनीय कार्याचे कौतुक करत त्यांना पुढील वाटचालीसाठी शुभेच्छा दिल्या. हा सत्कार सोहळा उत्साहपूर्ण वातावरणात पार पडला असून, समाजातील विविध स्तरांतील नागरिकांनी मोठ्या संख्येने उपस्थित राहून लेफ्टनंट कशिश मेथवानी यांच्या यशाचा गौरव केला.
