उल्हासनगर दि.२६ ( प्रमोद दळवी ): उल्हासनगर पोलीस ठाण्याच्या हद्दीत राहणाऱ्या एका महिलेचा फेसबुक अकाउंट हॅक करून त्या महिलेला अश्लील फोटो आणि व्हिडिओ पाठवणाऱ्या तरुणाला उल्हासनगर पोलिसांनी आयपी ऍड्रेस द्वारे तपास करून जळगाव येथून त्याला अटक करण्याची कामगिरी केली आहे.
पोलीस सूत्रांनी दिलेल्या माहितीनुसार उल्हासनगर पोलीस ठाण्याच्या हद्दीत राहणाऱ्या एका महिलेचा फेसबुक अकाउंट हॅक करून एका अज्ञात आरोपीने त्या महिलेला अश्लील फोटो आणि व्हिडिओ पाठवले होते. या घटनेमुळे ती महिला खूपच घाबरलेली होती. अखेर घाबरलेल्या त्या महिलेने तात्काळ उल्हासनगर पोलीस ठाण्यात धाव घेऊन पोलिसांना सर्व माहिती सांगितली. यासंदर्भात जुलै महिन्यात अज्ञात आरोपीविरुद्ध उल्हासनगर पोलीस ठाण्यात तक्रार दाखल करण्यात आली होती. वरिष्ठ पोलीस निरीक्षक संतोष आव्हाड यांच्या मार्गदर्शनाखाली पोलिसांनी या घटनेचा तपास सुरू केला. सर्वप्रथम पोलिसांनी फेसबुक आणि जीमेल या दोघांकडून माहिती गोळा केली. त्याचबरोबर आयपी ऍड्रेसच्या माध्यमातून पोलिसांनी या घटने संदर्भात सखोल चौकशी करून जळगाव येथून जितेश या तरुणाचा शोध घेऊन त्याला ताब्यात घेऊन अटक केली आहे.
उल्हासनगर पोलीस ठाण्याचे वरिष्ठ पोलीस निरीक्षक संतोष आव्हाड यांनी या घटने संदर्भात माहिती देताना सांगितले की जुलै महिन्यात एका महिलेने उल्हासनगर पोलीस ठाण्यात तक्रार देत तिचा फेसबुक अकाउंट हॅक झाला आहे आणि एक अज्ञात इसमाने तिला अश्लील व्हिडिओ पाठवले आहेत याबाबत तक्रार दिली. यावरून पोलिसांनी अज्ञात इस्मविरुद्ध गुन्हा दाखल केला होता . आमच्या पोलीस पथकांनी फेसबुक आणि जीमेल कडून माहिती मिळून आयपी ऍड्रेसच्या आधारे या गुन्ह्यातील आरोपीला पोलिसांनी ट्रेस करून त्याला जळगाव येथून अटक केली आहे. माझे नागरिकांना व महिलांना आव्हान आहे की अशा प्रकारे गुन्हा आपल्या सोबत जर घडला असेल तर आपण न घाबरता पोलीस स्टेशनला तक्रार देण्यासाठी येऊ शकता आपली मदत करण्यास पोलीस सदैव तयार आहेत असे त्यांनी सांगितले.
