उल्हासनगर दि. २९ ( प्रमोद दळवी ) : उल्हासनगरातील आर. के. तलरेजा महाविद्यालयाच्या अर्चना अखिलेश राम या विद्यार्थिनीने दिल्लीतील राजपथावर आयोजित राष्ट्रीय प्रजासत्ताक दिन शिबिर (RDC) परेडमध्ये यशस्वी सहभाग घेतला. देशपातळीवरील या मानाच्या परेडमध्ये सहभागी होणे ही उल्हासनगरसाठी अभिमानाची बाब आहे. या विद्यार्थिनीचे सर्वत्र कौतुक व अभिनंदन करण्यात येत आहे.
या यशामागे महाविद्यालयाचे NCC ANO कॅप्टन भरत बडगुजर यांचे मार्गदर्शन आणि सततचे प्रोत्साहन मोलाचे ठरले. तसेच महाविद्यालयाचे प्राचार्य डॉ. दिनेश काला यांनी दिलेल्या सहकार्यामुळे व पाठबळामुळे विद्यार्थिनीला हे यश संपादन करता आले. या उल्लेखनीय कामगिरीबद्दल महाविद्यालयातील प्राध्यापक, विद्यार्थी आणि पालकांकडून अभिनंदनाचा वर्षाव होत आहे.
